Евроиттифоқ Россияни “даҳшатли” санкциялар билан “сийламоқчи”

Европа Иттифоқи яқин ойларда Россияга қарши санкцияларни сезиларли даражада кенгайтиришни режалаштирмоқда. Бу ҳақда ЕИ ташқи сиёсат бўйича олий вакили Кая Каллас Германиянинг “Die Welt” нашрига маълум қилган.

“ЕИ санкциялари Россияга аллақачон катта зарар етказди, Россиянинг уруш машинасини 1 триллион евродан ортиқ маблағдан маҳрум қилди. Кузда эса уруш бошланганидан бери энг кенг қамровли санкциялар рўйхатини таклиф қиламан”, деган Каллас.

Унинг айтишича, янги чоралар қабул қилинса, санкцияга учраётган Россия субъектлари сони дарҳол учдан бирга кўпаяди.

“Москва урушни тугатмагунча босим кучайиб бориши керак”, деган у.

Каллас янги санкциялар пакетининг аниқ муддати ва тафсилотларини очиқламаган.

Маълумот учун, ЕИ июль ойида Россиянинг Украинадаги уруши муносабати билан навбатдаги санкциялар пакетини тасдиқлаб, мамлакатнинг банк сектори ва криптовалюта тармоқларига чекловлар жорий қилган эди.

Эслатиб ўтамиз, аввалоқ АҚШ Эронга қарши янги санкциялар пакетини жорий қилиб, мамлакат олий раҳбари Оятуллоҳ Мужтабо Хоманаийнинг асосий молиявий ҳамкорларидан бири ҳамда яна 13 нафар шахс ва ташкилотни қора рўйхатга киритганди.