Ермакнинг Украинадан чиқишига тақиқ қўйилди

Украина Президенти аппаратининг собиқ раҳбари Андрей Ермакка мамлакатдан чиқишга таъқиқ қўйилди. Бу ҳақда Олий рада депутати Алексей Гончаренко маълум қилди. 

Унга кўра, ушбу тақиқнинг асосий сабаби – Миллий антикоррупция бюроси (НАБУ) томонидан юборилган сўров бўлиб, унга учта айблов қўйилиши режалаштирилмоқда, лекин Ермакнинг қайси жиноятлар бўйича айбланиши мумкинлиги очиқланмаган. 

Депутат бу воқеани кулгули тарзда баён этган. 

“Аввал тизимни қуришда фаол иштирок этасан, сўнг ўзинг шу тизимнинг тишлари орасига тушасан”, дея ўз Telegram-каналида ёзган Гончаренко. 

“The Economist” хабарига кўра, Ермак ишдан бўшатилганидан сўнг хавотирга тушган ва “The New York Times”га интервью бериб, фронтга боришини билдирган. Президент Владимир Зеленский Ермакнинг ишдан бўшатилишини “Президент офисини қайта ишга тушириш” деб атаган ва унинг музокараларда доимо тўғри позицияни ҳимоя қилганини таъкидлаган.

Қайд этиш жоиз, 28 ноябрь куни НАБУ Ермакнинг уйида энергия соҳасидаги коррупция ишини тергов қилиш доирасида тинтув ўтказди. Шу куни Президент Владимир Зеленский Ермакни лавозимидан бўшатди.

ОАВ хабарига кўра, Ермак ишдан бўшаш арафасида Президентга танқид ва айбловлар билан мурожаат қилган.