Ерда топилган ўзга сайёраликлар ҳақидаги тафсилотлар очиқланди

АҚШ номаълум учувчи жисмлар ҳалокатга учраганидан кейин ўзга сайёраликларнинг тўртта турини топганини даъво қилмоқда. Бу ҳақда “New York Post” газетаси Марказий разведка бошқармаси (МРБ) томонидан молиялаштирилган дастурларнинг собиқ тадқиқотчиси, доктор Хэл Путхоффга таяниб хабар берди.

Қайд этилишича, ушбу баёнот “The Diary of a CEO” подкастида янграган. Унда Путхофф “Age of Disclosure” фильми режиссёри Дэн Фарра билан бирга иштирок этган. 89 ёшли олимнинг сўзларига кўра, ҳалокатлардан кейин объектларни олиб чиқиш операцияларида қатнашган одамлар камида тўртта алоҳида турдаги мавжудотлар ҳақида гапириб берган. Шу билан бирга, у ушбу материаллардан шахсан ўзи тўғридан тўғри фойдаланиш имконига эга бўлмаганини, аммо ўзи суҳбатлашган манбаларга ишонишини қайд этган.

Путхофф АҚШ ҳукумати айнан қайси турдаги ўзга сайёраликларни “топганига” аниқлик киритмаган. Бироқ унинг узоқ йиллик ҳамкасби ва AAWSAP дастурининг собиқ ходими доктор Эрика Дэвиснинг айтишича, гап “кулранглар”, “нордиклар”, “ҳашаротсимонлар” ва “рептилоидлар” ҳақида бормоқда.

Дэвиснинг сўзларига кўра, бу мавжудотларнинг барчаси гуманоид кўринишга эга, иккита қўли ва иккита оёғи бор. У бу борада разведка маълумотларига таянган. Тадқиқотчи аёлнинг таъкидлашича, рептилоидлар ва нордикларнинг бўйи тахминан олти футга — қарийб 183 сантиметрга етади. Бу ҳақда у 2025 йилда конгрессменлар Нэнси Мейс, Анна Паулина Луна ва Эрик Берлисон иштирок этган “UAP Disclosure Fund” йиғилишида гапириб берган.

Муайян назариялар тарафдорларининг таърифлашича, нордиклар келиб чиқиши ўзга сайёралик бўлишига қарамай, деярли Шимолий Европа аҳолисига ўхшаб кетади. Рептилоидлар эса тик юрадиган, одамникидек қўл-оёқлари ва узун думи бор, танаси тангачалар билан қопланган мавжудотлар сифатида тасвирланади. “Кулранглар” — ўзга сайёраликлар ҳақидаги кўплаб фильмлар, жумладан, “Учинчи даражали яқин учрашувлар” фильми орқали таниш бўлган, катта кўзли, кичкина, сочсиз мавжудотлардир.

АҚШ Ҳарбий-ҳаво кучлари разведкасининг собиқ ходими ва номаълум аномал ҳодисалар бўйича ишчи гуруҳ аъзоси Дэвид Граш 2023 йилда Конгрессда қасамёд остида баёнот бериб, АҚШ ихтиёрида ўнлаб номаълум учар жисмлар ҳалокатларидан кейин топилган “инсониятга тегишли бўлмаган биологик материаллар” мавжудлигини айтган. Қўшма Штатлар номаълум учар жисмлар ҳалокатларидан кейин ўзга сайёраликлар ҳаётининг тўртта турли турини топганликда гумон қилинмоқда.

Эслатиб ўтамиз, аввалроқ АҚШ Президенти Дональд Трамп ваъда қилган номаълум учар жисмлар ҳақидаги файллар нашр этиш бошлангани ҳақида хабар берилган эди.