Ёнаётган Туркия: мамлакатда ўрмон ёнғинлари сабаб юзлаб фуқаролар эвакуация қилинди

Кеча, 29 июль куни Туркиянинг Муғла, Анталия, Баликесир ва Чаноққалъа вилоятларида бир вақтнинг ўзида юзага келган ўрмон ёнғинлари сабаб автомобиль йўллари ёпилди, шифохона, қариялар уйи ва юзлаб фуқаролар эвакуация қилинди. Бу ҳақда TRT Haber хабар берди.

Муғланинг Сейдикемер туманида қишлоқ хўжалиги ерларида бошланган ёнғин қисқа вақт ичида ўрмонга тарқалган. Вилоят ҳокимлигининг маълумотига кўра, ёнғинни ўчириш ишларига 835 нафар ходим, 5 та самолёт, 18 та вертолёт, 93 та махсус ёнғин ўчириш машинаси ва бошқа техникалар жалб этилган.

Ёнғин хавфи сабаб 121 та уй, 202 нафар фуқаро ҳамда Сейдикемер давлат шифохонаси эвакуация қилинган. Шифохонадаги 45 нафар бемор Фетҳиядаги тиббиёт муассасаларига кўчирилган. Шунингдек, ҳудудда электр таъминоти узилган, Сейдикемер – Анталия автомобиль йўли эса вақтинча транспорт ҳаракати учун ёпилган.

Баликесирнинг Эдремит туманидаги Алтинолук маҳалласида Антандрос қадимий шаҳри яқинида бошланган ёнғин ҳам аҳоли яшаш пунктларига яқинлашган. Айрим ёзги уйлар эҳтиёт чораси сифатида бўшатилмоқда. Бундан ташқари, Айвалик ва Ҳавран туманларида ҳам янги ёнғинлар қайд этилган.

Анталянинг Кумлужа туманидаги Язир маҳалласида бошланган ёнғин кучли шамол сабабли тез тарқалган. Оқибатда Анталя – Кумлужа йўналишидаги D-400 автомобиль йўли икки йўналишда ҳам ёпилган. Маҳаллий ҳоким Баҳодир Гүнешнинг маълум қилишича, маҳалладаги уйлар босқичма-босқич эвакуация қилинмоқда. Аҳоли ва сайёҳлар жандармерия кузатувида хавфсиз ҳудудларга олиб чиқилган.

Туркия Қишлоқ ва ўрмон хўжалиги вазирлиги Анталиянинг Каш ва Айдин вилоятининг Назилли туманидаги ёнғинларнинг кучи пасайтирилганини, бироқ уларни тўлиқ назоратга олиш ишлари давом этаётганини билдирган. Вазирликка кўра, Муғла Сейдикемер, Анталия Кумлужа ҳамда Баликесирнинг Эдремит ва Гўмеч туманларидаги ёнғинларни ўчириш ишлари ҳамон давом этмоқда.

Шунингдек, Чаноққалъанинг Айважик тумани ва вилоят маркази яқинидаги Сарижаэли қишлоғида ҳам ўрмон ёнғинлари юз берган. Айважикдаги ёнғинга 5 та вертолёт ва ўнлаб махсус техникалар жалб этилган бўлса, Сарижаэлидаги ёнғин сабаб қишлоқдаги хусусий қариялар парвариш маркази эҳтиёт чораси сифатида эвакуация қилинган.

Эслатиб ўтамиз, аввалроқ Франция ва Испаниядаги энг кучли ёнғинлар фонида эвакуация қилинганларнинг умумий сони 300 минг кишидан ошгани ҳақида хабар берилган эди.