Ёнаётган Париж: Франциядаги байрам аъзага айланди (видео)

Европа Чемпионлар лигаси финалида “Пари Сен-Жермен” (ПСЖ)нинг ғалабасидан сўнг Франция пойтахти Парижда оммавий тартибсизликлар юз берди. Бу ҳақда Франция Ички ишлар вазирлиги хабар берди.

Маълумотларга кўра, бир киши ҳалок бўлган, яна бир киши комага тушган, 219 киши жароҳатланган ва қарийб 800 киши қўлга олинган.

Ҳалок бўлган йигит 2002 йилда туғилган бўлиб, у тунги байрам пайтида мототцикл бошқаруви устидан назоратни йўқотиб, бетон тўсиққа урилган.

Орадан бир неча соат ўтиб, 17 ёшли йигитга пичоқ билан ҳужум қилинган. Гувоҳларнинг айтишича, ўсмир талончилик содир этганидан кейин тўрт киши унга ташланган. Жабрланувчи оғир жароҳатлар билан шифохонага ётқизилган.

Финал ҳуштаги янграши билан Эйфель минораси ПСЖ рангларида ёритилган. Минглаб мухлислар кўчаларга чиқиб, жамоа тарихидаги йирик муваффақиятни нишонлай бошлаган.

Айниқса, пойтахтнинг мрказий кўчаларида вазият кескинлашди. Бу ерга қарийб 20 минг мухлис йиғилган. Байрам вақт ўтиши билан полиция билан тўқнашувларга, петардалар портлатилишига ва ёнғинларга айланган.

Тартибсизликлар оқибатида камида олти автомобиль, новвойхона ва ресторан бинолари зарар кўрган. Эйфель минораси атрофида ахлат контейнерлари ёниб кетган, полиция эса оломонни тарқатиш учун кўздан ёш оқизувчи газ қўллаган.

Парс дес Принсес яқинида ҳам мухлислар полицияга пиротехника воситаларини улоқтирган. Стадион ҳудудидаги тартибсизликлар ўйин давомидаёқ бошланган. Маҳаллий ОАВ маълумотларига кўра, 150 га яқин мухлис стадионга бостириб киришга уринган.

Воқеалар эҳтимоли олдиндан ҳисобга олиниб, Франция ҳукумати 22 минг нафар полициячи ва жандармларни сафарбар қилган эди. Уларнинг 8 минг нафари Париж ва унинг атрофида хизмат қилган.

ПСЖ президенти Нессер Аль-Хелаифи мухлисларни вазминликка чақириб, “муаммо чиқармасликни” сўраган. Клуб ҳам байрамларни масъулият билан ўтказишга даъват қилган, бироқ бу чақириқлар тартибсизликларнинг олдини ола олмаган.

Шунга қарамай, Франция Ички ишлар вазирлиги Париждаги тантанали чемпионлик парадини бекор қилиш учун асос йўқлигини маълум қилган.

Маълумот учун, 30 май куни бўлиб ўтган финалда пенальтилар сериясида ПСЖ 4:3 ҳисобида “Арсенал”дан устун келиб, Чемпионлар лигаси кубогини қўлга киритди. Шу тариқа парижликлар кетма-кет иккинчи мавсум Европанинг энг нуфузли клублар турнирида зафар қучди.