ЕИ Сурияга қарши иқтисодий санкцияларни бекор қилди

Европа Иттифоқи кенгаши Сурияга нисбатан қўлланилган барча иқтисодий чеклов чораларини (фақат хавфсизлик билан боғлиқ санкциялар бундан мустасно) бекор қилиш тўғрисида юридик ҳужжатларни қабул қилди. Бу ҳақда Европа Иттифоқи кенгашининг расмий сайтида эълон қилинди.

Маълум қилинишича, ушбу қарор 2025 йилнинг 20 май куни эълон қилинган сиёсий келишувни расман кучга киритади ҳамда Сурия халқини бирлаштириш ва янгича, инклюзив, тинч давлат қуриш йўлидаги саъй-ҳаракатларини қўллаб-қувватлашга қаратилган.

Шунингдек, кенгаш томонидан Сурияга нисбатан қўлланилган санкциялар рўйхатидан 24 та юридик шахс – банклар, нефть ишлаб чиқариш ва қайта ишлаш, пахта саноати ҳамда телекоммуникация соҳасида фаолият юритувчи компаниялар ва оммавий ахборот воситалари чиқариб ташланган. Бу қарор Суриянинг иқтисодий тикланишини қўллаб-қувватлашнинг бир қисми сифатида қабул қилинган.

Европа Иттифоқининг Ташқи ишлар ва хавфсизлик сиёсати бўйича олий вакили Кая Каллас ушбу қарорни Суриянинг тикланиши учун “тарихий” деб атаган.

“Бугунги тарихий қарор Суриянинг қайта тикланишига ҳақиқий ёрдам кўрсатиш ва барча сурияликлар орзусидаги сиёсий ўтиш жараёнини қўллаб-қувватлаш йўлидаги тўғри қадамдир. ЕИ сўнгги 14 йил давомида Сурия халқининг ёнида бўлди ва бу ёндашувини давом эттиради. Бугун ЕИ ўзининг Суриянинг инклюзив ва тинч келажагини барпо этишга тайёр шерик эканини яна бир бор тасдиқламоқда”, деган Каллас.

Шу билан бирга, ЕИ Кенгаши Суриядаги сиёсий ўтиш жараёнига содиқлигини билдирган ҳолда, Башар Асад режими билан боғлиқ айрим шахслар ва ташкилотларга нисбатан санкцияларни 2026 йил 1 июнгача узайтирган.

Қолаверса, жорий йилнинг март ойида Суриянинг соҳилбўйи ҳудудларида содир бўлган зўравонликлар муносабати билан, ЕИ Глобал инсон ҳуқуқлари санкциялари режими доирасида икки нафар шахс ва учта ташкилотга нисбатан янги чеклов чораларини жорий этган. Улар инсон ҳуқуқларини жиддий равишда бузганликда айбланмоқда.

Билдирилишича, ЕИ кенгаши Суриядаги вазиятни диққат билан кузатишда давом этади ва инсон ҳуқуқларини бузаётган ёки мамлакатдаги беқарорликни кучайтираётган томонларга қарши янги санкциялар жорий қилишга тайёр.

Эслатиб ўтамиз, жорий йилнинг 13 май куни АҚШ Президенти Дональд Трамп Сурияга қўйилган санкцияларни олиб ташлаш ва “унга иккинчи имконият бериш”га ваъда берганди. Унинг айтишича, бу чекловлар “қатъий ва фалокат даражасида” бўлган, аммо ўз вазифасини бажарган.

Кейинроқ эса Дональд Трамп Саудия Арабистонига ташрифи давомида Сурия муваққат президенти Аҳмад аш-Шара билан шахсан учрашди. Учрашувда Трамп яна бир бор АҚШнинг Сурия бўйича санкцияларни бекор қилишини эълон қилган.