ЕИ россияликларга кўп марталик Шенген визасини беришни тақиқламоқчи

Европа Иттифоқи Россия фуқароларига кўп марталик Шенген визаларини беришни деярли тўлиқ тўхтатишга тайёргарлик кўрмоқда. Бу ҳақда ушбу масалани муҳокама қилаётган уч нафар европалик амалдорга таяниб, “Politico” нашри хабар берди.

Янги чорага кўра, Россия фуқароларига асосан бир марталик кириш визалари берилади. Чекловлар шу ҳафта ичида маъқулланиши мумкин.

Брюссель Украина уруши бошланганидан сўнг, 2022 йилда Москва билан соддалаштирилган виза тартиби тўғрисидаги келишувни тўхтатиб, Россия фуқаролари учун виза олиш жараёнини мураккаблаштирган. Айрим ЕИ аъзо давлатлари, хусусан, Болтиқбўйи мамлакатлари бундан ҳам қаттиқроқ чекловлар жорий қилиб, Россия фуқаролари учун ўз ҳудудларига киришни деярли тўсиб қўйди. Шу билан бирга, визалар бериш масаласи ҳар бир давлат ҳукуматининг ваколатида қолмоқда. Бу эса Европа комиссияси жараённи мураккаблаштириши мумкинлигини, бироқ барча Шенген мамлакатларига кириш бўйича тўлиқ тақиқ жорий этиш ваколатига эга эмаслигини англатади.

Еврокомиссия статистик маълумотларига кўра, 2024 йилда Россия Шенген визасига энг кўп ариза топширган давлатлардан бири бўлган – Россия фуқаролари қарийб 606 минг ариза топширган, шундан 500 мингдан ортиғи тасдиқланган. Шу билан бирга, 2023 йилга нисбатан визалар сони ортган бўлса-да, у 2019 йилдаги пандемиягача ва урушгача бўлган давр кўрсаткичларидан анча паст – ўша йили россияликларга 4 миллиондан ортиқ ҳужжат расмийлаштирилган. Ҳозирда энг фаол равишда виза бераётган мамлакатлар – Венгрия, Франция, Испания ва Италия.

“Politico”нинг ёзишича, Европа комиссияси декабрь ойида янги умумевропа виза стратегиясини тақдим этмоқчи. Унга кўра, ЕИ душман деб ҳисоблаган мамлакатларга нисбатан виза сиёсати воситаларидан фойдаланиш ва россияликлар учун ҳужжат бериш мезонларини янада қатъийлаштириш кўзда тутилган.

ЕИ Россия билан соддалаштирилган виза келишувини 2022 йил 12-сентабрда тўхтатган, оқибатда аризаларни кўриб чиқиш муддати узайтирилган ва консуллик тўлови оширилган. Польша, Латвия, Литва, Эстония ва Чехия каби қатор Европа давлатлари эса россиялик сайёҳларга виза беришни бутунлай тўхтатган.