ЕИ “Ҳарбий Шенген” тизимини жорий этиши мумкин

Эстония Мудофаа вазири Ханно Певкур Европа армиясини тузиш ғоясини шарҳлар экан, Европа Иттифоқида “Ҳарбий Шенген” тизимини жорий этишни таклиф қилди. Унинг фикрича, бу тизим бир мамлакатдан бошқасига ҳарбий юкларни тезда етказиб бериш имконини беради. Бу ҳақда Ханно Певкур “El País” нашрига берган интервьюсида сўз очди.

“Мудофаа режалаштириш ва ҳарбий режалаштириш НАТО масъулиятига киради. Аммо Европа Иттифоқи чекловларни бекор қилиш жараёнини тезлаштириши мумкин. Бизга шундай “Ҳарбий Шенген зонаси” керакки, агар бизга Испаниядан Эстонияга бирор нарса етказиш зарур бўлса, ҳеч қандай ҳужжат расмийлаштирмасдан тезда ҳаракатлана олайлик”, дейди Певкур

Эслатиб ўтамиз, аввалроқ Европа Иттифоқи мамлакатлари 150 миллиард евролик ҳарбий кредитлаш фондини ишга туширишни режалаштираётгани, бу фонд иттифоқнинг умумий бюджети билан таъминланиши ҳақида хабар берилган эди.

Шунингдек, НАТО жорий йилнинг август ойида Европанинг қурол захиралари Украина учун кўрсатилаётган ҳарбий ёрдам сабаб анча камайгани, шу боис Европа эндиликда Киевга ўз омборларидан қурол етказишни тобора камайтираётгани маълум бўлганди.