Япония мамлакатдан чиқиш солиғини уч баробарга оширди

Япония туристлар оқимини жиловлаш мақсадида мамлакатдан чиқиш солиғини (Sayonara tax) уч баробарга оширди. Бу ҳақда “The Guardian” хабар берди.

Қайд этилишича, бугун, 1 июлдан бошлаб Япония барча сайёҳлар – ҳам хорижликлар, ҳам мамлакат фуқаролари учун чиқиш солиғини уч баробарга оширди. Эндиликда Япониядан чиқиб кетаётганда 3 минг иена (тахминан 220 минг сўм) тўлаш талаб этилади.

Мамлакат ҳукумати, шунингдек, виза йиғимлари нархини ҳам беш баробарга оширган. Энди бир марталик виза учун йиғим 15 минг иенани (44 минг тенге) ташкил этади.

Нашрнинг қайд этишича, Япония хорижлик сайёҳлар сонининг тинимсиз ўсиб бораётгани билан боғлиқ вазиятни назорат қилишга интилмоқда. Шу йилнинг ўзидаёқ айрим диққатга сазовор жойларга ташриф буюришда норезидентлар учун кириш чипталари нархи ошгани кузатилган.

Хусусан, 1 мартдан бошлаб UNESCO’нинг Бутунжаҳон мероси объекти ҳисобланган Химежи қалъасига хорижлик сайёҳлар учун кириш чиптаси нархи 2500 иенагача (183 минг сўм) кўтарилган. 2025 йилда Химежи қалъасига ташриф буюрган хорижлик сайёҳлар сони 2018 йилдаги 387 минг кишига нисбатан 547 минг кишигача кўпайган.

Маълумот учун, Sayonara tax – бу Япониядан чиқиб кетаётган жисмоний шахслардан ундириладиган халқаро чиқиш солиғидир. Лотинча “Sayonara” сўзи япон тилида “Хайр” ёки “Алвидо” деган маънони англатади, шу сабабли бу йиғим ОАВ ва халқ орасида рамзий равишда шундай ном олган. Мамлакатнинг расмий қонунчилигида эса у Халқаро сайёҳлик солиғи (International tourist departure tax) деб юритилади.

Эслатиб ўтамиз, аввалроқ Япония жорий йил 1 июлдан бошлаб хориж фуқаролари учун виза расмийлаштириш нархини беш баробарга оширгани ҳақида хабар берилган эди.