Янги фармоннинг самарасини минглаб инсонлар ҳис қилади – Саида Мирзиёева

Аввалроқ, Ўзбекистон Президенти Шавкат Мирзиёев “Кичик бизнес субъектларининг ўсиши учун янада қулай иқтисодий ва маъмурий шарт-шароитлар яратиш тўғрисида”ги фармонни имзолагани ҳақида хабар берилган эди. Мазкур янги фармоннинг самарасини минглаб инсонлар ҳис қилади. Бу ҳақда Ўзбекистон Президенти Администрацияси раҳбари Саида Мирзиёева ўзининг Telegram-каналида ёзди.

“Сўнгги кунларда кичик бизнес учун шароитлар енгиллаштирилиши ҳақидаги янгиликлар ишбилармон доиралар томонидан илиқ кутиб олинганини кўриб турибмиз”, дейди Ўзбекистон Президенти Администрацияси раҳбари.

Унинг билдиришича, бу масала анчадан буён тадбиркорлар учун оғриқли бўлиб келаётган эди. Ҳудудларга сафарлар чоғида улар ҚҚС тўлашга ўтиш бўйича 1 миллиард сўмлик чегара жуда пастлиги, солиқ маъмуриятчилиги мураккаблиги, текширув ва ҳисоботлар эса ҳаддан ташқари кўплигини таъкидлаб келган. Натижада бизнес хотиржам ривожланиш ўрнига сунъий равишда бўлинишга мажбур бўлган.

“Президентимиз имзолаган фармонга мувофиқ, ушбу чегара 5 миллиард сўмгача оширилди. Бунинг самарасини, энг аввало, оилавий корхоналар, кафелар, дўконлар, хизмат кўрсатувчилар – бир сўз билан айтганда, ўзининг кундалик меҳнати билан мамлакатимиз иқтисодиётини ҳаракатга келтираётган минглаб инсонлар ҳис қилади”, дейди Саида Мирзиёева.

Шу билан бирга, ҳужжатда кичик бизнесни қўллаб-қувватлашга қаратилган яна бир қатор муҳим чора-тадбирлар назарда тутилган.