Рекорд: Ямаль ва Ҳоланднинг трансфер нархи кескин кўтарилди

Нуфузли “Transfermarkt” портали Жаҳон чемпионатидан сўнг футболчиларнинг бозор қийматини янгилади. Унга кўра, Ламин Ямаль ва Эрлинг Ҳоланднинг бозор қиймати тарихда илк бор 220 миллион еврога етди.

Янгиланган рейтингда испаниялик ва норвегиялик футболчиларнинг трансфер қиймати 20 миллион еврога ошди. Шу вақтга қадар “Transfermarkt” ҳеч бир футболчини 200 миллион евродан юқори баҳоламаган эди.

Франция терма жамоаси ҳужумчиси ва 2026 йилги Жаҳон чемпионатининг энг яхши тўпурари Килиан Мбаппенинг ҳам қиймати 20 миллион еврога ошди. Шу тариқа, унинг бозор қиймати 2026 йил июнь ойида пасайтирилганидан кейин яна 200 миллион еврога қайтди.

Шунингдек, бозор қиймати камида 100 миллион евро бўлган футболчилар рўйхатига яна 4 нафар ўйинчи қўшилди. Англиялик Эллиотт Андерсон ва Морган Роджерснинг ҳар бири 110 миллион евро, испаниялик Пау Кубарси ҳамда аргентиналик Энцо Фернандес эса 100 миллион еврога баҳоланди.

Шундай қилиб, ҳозирда трансфер қиймати 100 миллион евро ёки ундан юқори бўлган футболчилар сони 26 нафарга етди.

Фоиз ҳисобидаги энг катта ўсиш эса 40 ёшли Кабо-Верде дарвозабони Возинья ҳиссасига тўғри келди. Унинг трансфер қиймати 50 минг евродан 500 минг еврогача кўтарилиб, ўн баробарга ошди.

Жаҳон чемпионатидан кейин “Transfermarkt” портали мундиалда иштирок этган 99 нафар футболчининг бозор қийматини янгилади.

Эслатиб ўтамиз, 2026 йилги Жаҳон чемпионати 11 июндан 19 июлгача АҚШ, Канада ва Мексика мезбонлигида ўтказилди. Тарихда илк бор мусобақада 48 та терма жамоа иштирок этди. Финалда Испания қўшимча вақтда Аргентинани 1:0 ҳисобида мағлуб этиб, чемпионликни қўлга киритди. Учинчи ўрин учун кечган баҳсда эса Англия Францияни 6:4 ҳисобида мағлуб этди.