Вучич АҚШ Эронга 48 соат ичида зарба бериши мумкинлигини айтди

АҚШ Эронга яқин 48 соат ичида зарба бериши мумкин, шунингдек, халқаро вазиятни издан чиқарадиган яна бир қатор воқеалар юз бериши эҳтимоли бор. Бу ҳақда Сербия Президенти Александр Вучич Pink TV телеканали эфирида сўз очди.

“Мен яқин 48 соат ичида Эронга зарба берилишини ва яна айрим йирик воқеаларни кутяпман. Ҳозирги шароит осон эмас. Тинчликни сақлаб қолишга бўлган садоқатимиз ҳал қилувчи аҳамиятга эга, деб ишонаман”, дейди Сербия раҳбари.

Вучичнинг фикрича, ҳужум яқинлашувига Жеффри Эпштейн иши бўйича ҳужжатларнинг эълон қилиниши туртки бўлмоқда. У буни Моника Левински атрофидаги можаро билан қиёслаган.

“Шундай бемаъниликлар пайдо бўлиши билан кимнидир бомбардимон қилишни бошлашади. Қарор қабул қилишни тезлаштиришадими? Мен бунга деярли ишонаман”, деган Вучич.

Эслатиб ўтамиз, аввалроқ АҚШ Президенти Дональд Трамп Эронга томон авиацион зарба гуруҳи – авиаташувчи кемалар гуруҳи юборилганини маълум қилганди. “Axios” нашри Оқ уй Эронга нисбатан куч ишлатиш сценарийсини кўриб чиқаётгани ҳақида ёзган. Эрон Олий раҳнамоси Оятуллоҳ Али Хоманаий эса АҚШ ҳужуми содир бўлса, можаро бутун минтақани қамраб олиши мумкинлиги ҳақида огоҳлантирганди.