Венгрия парламенти Швециянинг НАТОга киришини маъқуллади

Венгрия парламенти кеча, 26 февраль куни Швециянинг НАТОга аъзо бўлиш ҳақидаги аризасини маъқуллади. Бу ҳақда “Politico” хабар берди.

Ушбу қарорни 188 нафар депутат ёқлаб, олти нафари эса қарши овоз берди.

Бу масала бўйича овоз беришни узоқ вақт кечиктирган Туркия парламенти январь ойида Швециянинг таклифини маъқуллаганидан сўнг, Венгрия Швециянинг иттифоққа кириш йўлидаги сўнгги тўсиқ бўлиб қолганди.

"Швециянинг НАТОга кириши Венгрия хавфсизлигини мустаҳкамлайди, шунинг учун мен сизни ушбу аризани маъқуллашингизни сўрайман", деган Бош вазир Виктор Орбан парламентнинг баҳорги сессиясининг очилишида.

Венгрия парламентидаги овоз беришдан сўнг Швеция Бош вазири Ульф Кристерссон буни ўз мамлакати учун тарихий кун деб атади.

“Бугун тарихий кун. НАТОга аъзо барча давлатларнинг парламентлари Швециянинг альянсга аъзо бўлиши учун овоз берди. Швеция Евро-Атлантика хавфсизлиги учун масъулиятни ўз зиммасига олишга тайёр”, деб ёзди Кристерссон Х’даги саҳифасида.

НАТО Бош котиби Йенс Столтенберг Стокгольмни альянсга қўшилаётгани билан табриклади. 

“Мен Венгрия парламентининг Швециянинг НАТОга аъзолигини ратификация қилиш бўйича овоз беришини олқишлайман. Энди барча иттифоқчилар қарорни маъқуллаганидан сўнг, Швеция НАТОнинг 32-иттифоқчисига айланади. Швециянинг аъзолиги барчамизни янада кучлироқ ва хавфсизроқ қилади”, дейди у Х ижтимоий тармоғида.

Маълумот учун, 2022 йил баҳорида Швеция ва Финляндия НАТОга аъзо бўлиш учун ариза топширган. Қўшилиш бўйича музокаралар 2022 йил июнь ойида Мадрид меморандумининг имзоланишига олиб келди, бу Шимолий Европа мамлакатларини альянсга қабул қилиш жараёни учун йўл харитасини тақдим этди. Дастлаб Швеция ва Финляндия бир вақтнинг ўзида НАТОга қўшилиши режалаштирилган эди, аммо Швециянинг Туркия ва Венгрия билан бўлган қийинчиликлари туфайли Финляндия 2023 йил 4 апрелда блокка мустақил равишда қўшилди.

2024 йилнинг январида Туркия Швециянинг иттифоққа киришини маъқуллади. Венгрия Стокгольм аризасини ратификация қилмаган охирги давлат эди.