Венесуэлада ҳантавирус аниқланган уч киши вафот этди

Венесуэланинг шарқидаги Ансоатеги штатида хантавирус юқтиргани тасдиқланган уч киши вафот этди. Бу ҳақда мамлакат Соғлиқни сақлаш вазирлиги хабар қилди.

Вазирликнинг кеча, 21 июль куни тарқатган баёнотига кўра, Баринас штатида ҳалок бўлган яна икки киши – тиббиёт ходимларининг ўлими Ансоатегидаги ҳолатлар билан боғлиқ эмас ва ҳозирда текширилмоқда. Қайд этилишича, бу алоҳида ҳолатлар бўлиб, аҳоли саломатлиги учун хавф туғдирмайди.

Баёнотда таъкидланишича, мазкур вирус қишлоқ ва қишлоқ хўжалиги ҳудудларида яшовчи кемирувчилар орқали юқади. Асосан ёпиқ жойларда кемирувчиларнинг пешоби, ахлати ёки сўлаги заррачаларини нафас орқали ютиш натижасида инфекция юқади.

“Мамлакатимизда бу вируснинг одамдан одамга юқиши бўйича илмий далиллар мавжуд эмас”, дейилган вазирлик баёнотида.

Эслатиб ўтамиз, аввалроқ АҚШ Касалликларни назорат қилиш ва олдини олиш маркази (CDC) ўтган ой круиз кемаси билан боғлиқ ҳантавирус авж олишига жавоб чоралари якунланганини маълум қилган эди. Ушбу эпидемияда уч киши ҳалок бўлган.

CDC маълумотига кўра, ўша ҳолатда аниқланган Анд вируси одамдан одамга яқин ва узоқ муддатли мулоқот орқали юқиши мумкин бўлган ягона маълум ҳантавирус ҳисобланади.