Венесуэла 5 йил ичида илк бор Исроил билан алоқа ўрнатди

Венесуэла 2020 йилдан буён илк бор Исроилга нефть партиясини юборди. Бу ҳақда “Bloomberg” хабар берди.

Таъкидланишича, Венесуэла кўп йиллардан сўнг илк бор Исроилга нефть юбормоқда. Бунга Қўшма Штатлар томонидан мамлакат Президенти Николас Мадуронинг қўлга олиниши ортидан ушбу Лотин Америкаси давлати экспортининг кенгайгани сабаб бўлган.

“Нефть манзилга етиб борганида, бу 2020 йил ўрталаридан бери илк шундай етказиб бериш бўлади. Ўшанда Исроил қарийб 470 минг баррель нефть сотиб олган эди”, дейилади хабарда.

Агентлик манбаларининг маълум қилишича, юк Ўрта ер денгизи минтақасидаги энг йирик нефтни қайта ишловчи компания – Bazan Group учун етказиб берилмоқда. Bazan компанияси (Oil Refineries Ltd номи билан ҳам танилган) изоҳ беришдан бош тортган, Исроил Энергетика вазирлиги эса мамлакат нефтни қаердан олаётгани ҳақида маълумот беришни рад этган.

Нашр таҳлилчиларининг қайд этишича, ушбу келишув Мадуронинг ҳокимиятдан четлатилиши мамлакатдаги нефть оқимларини қандай ўзгартираётганининг навбатдаги далилидир. Аввал Венесуэла нефтни асосан Хитойга етказиб берган бўлса, ўтган ой асосий харидорлар Ҳиндистон, Испания ва АҚШ бўлган.

Қайд этиш жоиз, 3 январь куни Қўшма Штатлар Венесуэлага кенг кўламли зарба берган, мамлакат Президенти Николас Мадуро ва унинг турмуш ўртоғи Силия Флорес қўлга олиниб, Нью-Йоркка олиб кетилган. АҚШ Президенти Дональд Трамп уларнинг “наркотерроризм”га алоқадор бўлгани ва жумладан АҚШ учун таҳдид солгани сабабли суд олдида жавоб беришини билдирган.

Мадуро ва унинг рафиқаси Нью-Йоркдаги суд мажлисида ўзларига қўйилган айбловлар бўйича айбсиз эканини маълум қилган.