Ван Дейк терма жамоадаги фаолиятини якунлаши мумкин

“Ливерпуль” ва Нидерландия терма жамоаси ҳимоячиси Виржил ван Дейк 2026 йилги Жаҳон чемпионатидан сўнг миллий жамоадан кетиши мумкинлигини тан олди. Бу ҳақда NU.nl нашри хабар берди. 

Жаҳон чемпионатида Нидерландия терма жамоаси “Ф” гуруҳида Япония, Швеция ва Тунисга қарши майдонга тушади.

“Аммо бу терма жамоа билан сўнгги турнирим бўладими ёки йўқми – ҳозирча билмайман. Бу ҳақда фақат Жаҳон чемпионатидан кейин ўйлайман. Аввал соғлиғимни тиклаб олишим ва “Ливерпуль”да ўтган мавсум давомида бўлган барча воқеаларни қайта таҳлил қилишим керак. Умид қиламанки, барчасини Жаҳон чемпионати билан якунлай оламан”, дейди ван Дейк.

Маълумот учун, 34 ёшли Виржил ван Дейк Нидерландия терма жамоаси сафида 91 та ўйин ўтказиб, 12 та гол урган. У миллий жамоа билан 2024 йилги Европа чемпионати ярим финалига, 2022 йилги Жаҳон чемпионати чорак финалига чиққан ҳамда бир марта Миллатлар лигасида кумуш медални қўлга киритган.