Вэнс идеал вариант – Трамп (видео)

АҚШ Президенти Дональд Трамп 2028 йилги президентлик сайловлари учун вице-президент Жей Ди Вэнс ва Давлат котиби Марко Рубиони “идеал жамоа” деб атади. Бу ҳақда у “The Hill” нашрига берган интервьюсида сўз очди.

Оқ уй раҳбари Миллий полиция ҳафталиги муносабати билан ўтказилган тадбирда: “Кимга Жей Ди Вэнс ёқади? Кимга Марко Рубио ёқади? Жуда яхши. Бу ажойиб танловга ўхшайди”, деган.

Трампнинг таъкидлашича, Жей Ди Вэнс “идеал вариант” бўлган ва унинг вице-президентликка танлови ҳам “идеал қарор” ҳисобланади.

Шу билан бирга, у бу сўзлари ҳали расмий қўллаб-қувватлаш эмаслигини айтган.

“Бу ҳеч қандай маънода мен уларни қўллаяпман дегани эмас. Лекин барибир бу президентликка номзод ва вице-президентликка номзод каби эшитилади”, деган Трамп.

Марко Рубио 2016 йилда ҳам президентликка номзодини қўйган, аммо праймеризда Трампга ютқазгач, кампаниясини тўхтатган эди. Кейин у Сенатга қайтган ва Трампнинг иккинчи маъмуриятига қўшилгунча сенатор бўлиб ишлаган.

Жей Ди Вэнс ҳам сенаторликдан кейин Трамп жамоасига қўшилган.

Ҳозирча уларнинг ҳеч бири 2028 йилги сайловларда иштирок этишини расман эълон қилмаган. Аммо Марко Рубио декабрь ойида, агар Вэнс президентликка номзодини қўйса, уни биринчи бўлиб қўллаб-қувватлашини айтган эди.

Эслатиб ўтамиз, аввалроқ Дональд Трамп 2028 йилги президентлик сайловларидан кейин унинг ўрнини ким эгаллаши мумкинлиги ҳақида тез-тез ўйлаши ва бу мавзуда атрофидагилар билан муҳокама олиб бораётгани ҳақида хабар берилганди.