Ўзбекистонликларни энг иссиқ ёз кутяпти – Ўзгидромет

Жорий йилда ўзбекистонликларни энг иссиқ ёз кутмоқда. Бу ҳақда Ўзгидромет хабар берди.

Унга кўра, ҳозирда кузатилаётган Эль-Ниньо табиий ҳодисаси 2024 йилнинг апрелигача давом этади. Ушбу ҳодиса 10 та рақамли иқлим моделлари ҳисоб-китобларининг ўртача натижаси ҳисобланади. Кейинчалик, илмий асосларга кўра, Ўзбекистонда одатдаги иссиқ ёз фасли (Тошкентда ҳаво ҳарорати 40 даражагача), қуруқ куз ва совуқ қиш билан тавсифланган Ла-Нинья жараёни ривожлана бошлайди. Қуруқ куз, яъни ёғингарчилик миқдори меъёрдан паст бўлиши кутилмоқда.

Ўзгидрометнинг таъкидлашича, иссиқ ёз – Ўзбекистон иқлими учун тез-тез учрайдиган ҳодиса. Жануб ва чўл ҳудудларида 40-45 даражагача, қолган ҳудудларда эса 40-42 даражагача иссиқ бўлади. Энг иссиқ ҳаво ёз ойида одатда 5−7 кун давом этадиган термал тушкунлик билан боғлиқ ва бундай ҳолат 2-3 маротаба кузатилади.

Маълумот ўрнида, Эл-Ниньо об-ҳаво феномени ўртача 2-7 йилда бир марта содир бўлади ва одатда 9 ойдан 12 ойгача давом этади. Бу Тинч океани марказий ва шарқий тропикларида сув юзасидаги ҳароратнинг кўтарилиши билан боғлиқ иқлим режими ҳисобланади.