Ўзбекистон ЖСТ аъзоси бўлиш учун фақат 1 давлат билан музокарани якунлаши қолди

Ўзбекистон Жаҳон савдо ташкилоти аъзоси бўлиш учун фақат 1 давлат билан музокарани якунлаши керак. Бу ҳақда Президентнинг Жаҳон савдо ташкилоти бўйича вакили Азизбек Ўринов маълум қилди.

Унинг билдиришича, Ўзбекистон 2025 йида ЖСТга аъзо 34 давлатдан 33 таси билан икки томонлама бозорга кириш музокараларини якунлаган. 40 дан ортиқ музокара раундлари ҳамда Ишчи гуруҳнинг 2 та йиғилиши ўтказилиб, 200 дан ортиқ ёзма саволларга жавоблар берилган. Хусусан, Европа Иттифоқи, Хитой, Россия, Буюк Британия, Швейцария, Канада, Австралия ва бошқа йирик савдо ҳамкорлари билан келишувларга эришилган. Ҳозирда фақат битта икки томонлама музокара якунланиши кутилмоқда.

Билдирилишича, 2025 йилда Ўзбекистонда ЖСТ талабларига мувофиқ 30 та норматив-ҳуқуқий ҳужжат қабул қилиган, жумладан:

• Ўзбекистон Республикасининг 4 та қонуни;
• Президентнинг 8 та фармон ва қарорлари;
• Вазирлар Маҳкамасининг 12 та қарори;
• 6 та идоравий ҳужжат;
• Қўшимча равишда 29 та норматив-ҳуқуқий ҳужжат лойиҳаси тайёрланган.

Шунингдек, божхона тартиботлари, экспорт божлари, савдони ҳимоя қилиш чоралари, интеллектуал мулк ҳуқуқларини ҳимоя қилиш, техник тартибга солиш, санитария ва фитосанитария ҳамда савдодаги техник тўсиқлар (SPS ва TBT) соҳаларида комплекс ислоҳотлар амалга оширилган.

2026 йил учун устувор вазифалар сифатида қолган битта (Тайвань билан) икки томонлама музокарани якунлаш, кўп томонлама музокаралар ва Ишчи гуруҳ ҳисоботини тугатиш, қонунчиликни тўлиқ мувофиқлаштириш ва Ўзбекистоннинг ЖСТга аъзо бўлиш жараёнини якунига етказиш белгиланган.

Эслатиб ўтамиз, аввалроқ Азизбек Ўринов Россия Федерацияси Иқтисодий ривожланиш вазири Максим Решетников билан биргаликда Ўзбекистоннинг Жаҳон савдо ташкилотига аъзо бўлиш жараёнида икки томонлама бозорга кириш музокараларини якунловчи протоколни имзолагани ҳақида хабар берилган эди.