O‘zbekiston yana bir davlat bilan diplomatik aloqa o‘rnatdi

O‘zbekiston Janubiy Amerikadagi Surinam davlati bilan diplomatik munosabatlar o‘rnatdi. Bu haqda Tashqi ishlar vazirligi matbuot kotibi xabar berdi.

AQSHning Nyu-York shahrida ikki mamlakatning Birlashgan Millatlar Tashkilotidagi doimiy vakillari Ulug‘bek Lapasov hamda Sunil Algram Sitaldin tegishli kommyunikeni imzoladi. Shu tariqa Surinam O‘zbekiston bilan diplomatik aloqa o‘rnatgan 158-davlat bo‘ldi.

Ma’lumot uchun, Surinam Janubiy Amerikaning shimoli-sharqiy sohilidagi kichik davlat. U keng tropik o‘rmonlari, me’morchiligi va turli milliy an’analarning ajoyib aralashmasi bo‘lgan madaniyati bilan mashhur.

Eslatib o‘tamiz, avvalroq Nyu-York shahrida bo‘lib o‘tgan uchrashuvda O‘zbekiston va Somali o‘rtasida diplomatik aloqalarni o‘rnatish haqidagi qo‘shma kommyunike imzolangandi. Uchrashuvda siyosiy, iqtisodiy va madaniy-gumanitar sohalarda hamkorlikning ikki mamlakat uchun ham manfaatli tomonlarini topish maqsadida o‘zaro aloqalarni oshirish bo‘yicha kelishuvga erishilgandi.