Ўзбекистон яна бир давлат билан дипломатик алоқа ўрнатди

Ўзбекистон Жанубий Америкадаги Суринам давлати билан дипломатик муносабатлар ўрнатди. Бу ҳақда Ташқи ишлар вазирлиги матбуот котиби хабар берди.

АҚШнинг Нью-Йорк шаҳрида икки мамлакатнинг Бирлашган Миллатлар Ташкилотидаги доимий вакиллари Улуғбек Лапасов ҳамда Сунил Алграм Ситалдин тегишли коммюникени имзолади. Шу тариқа Суринам Ўзбекистон билан дипломатик алоқа ўрнатган 158-давлат бўлди.

Маълумот учун, Суринам Жанубий Американинг шимоли-шарқий соҳилидаги кичик давлат. У кенг тропик ўрмонлари, меъморчилиги ва турли миллий анъаналарнинг ажойиб аралашмаси бўлган маданияти билан машҳур.

Эслатиб ўтамиз, аввалроқ Нью-Йорк шаҳрида бўлиб ўтган учрашувда Ўзбекистон ва Сомали ўртасида дипломатик алоқаларни ўрнатиш ҳақидаги қўшма коммюнике имзоланганди. Учрашувда сиёсий, иқтисодий ва маданий-гуманитар соҳаларда ҳамкорликнинг икки мамлакат учун ҳам манфаатли томонларини топиш мақсадида ўзаро алоқаларни ошириш бўйича келишувга эришилганди.