Ўзбекистон МТЖ собиқ устози янги жамоада ишлайди

Ўзбекистон миллий терма жамоаси собиқ бош мурабббийи Эктор Купер Перунинг “Университарио” клуби билан шартнома имзолашига бир қадам қолди. Бу ҳақда инсайдер Николо Скира хабар берди.

Манбага кўра, Купер янги жамоаси билан 2026 йил декабргача амал қиладиган шартнома имзолайди. Унинг сўнгги ўйини Сурия терма жамоасида бўлган ва у жамоани 2024 йилда тарк этганди.

70 ёшли мутахассис 1999 йилдан 2001 йилгача “Валенсия”да ишлагани билан кўпчиликни ёдида қолган. Купер ушбу йилларда жамоани кетма-кет Чемпионлар лигаси финалига олиб чиққан, аммо иккала сафар ҳам муваффақиятсизликка учраган. Шунингдек, у “Интер”, “Мальорка”, “Бетис”, “Парма” клублари ва Миср, Ўзбекистон, Конго ва Сурия терма жамоаларни бошқарган. 
 
Узоқ йиллик мураббийлик фаолияти давомида Купер учта йирик совринга эга чиққан. У “Мальорка” ва “Валенсия” билан биттадан Испания Суперкубогини қўлга киритган. Бундан ташқари, “Ланус” билан КОНМЕБОЛ кубогида ғолиб бўлган.

Таъкидлаш жоизки, “Университарио” ҳозирда Перу лигаси жадвалида 13 та ўйиндан сўнг 24 очко билан тўртинчи ўринда эгаллаб турибди. Клуб ўз тарихида рекорд даражадаги 29 марта Перу чемпионлиги унвонини қўлга киритган.

Маълумот учун, Эктор Купер 2018 йил августидан 2019 йил сентябригача Ўзбекистон миллий терма жамоасида бош мурабббий лавозимида фаолият олиб борган. Унинг қўл остида терма жамоа 17 та ўйин ўтказиб, 7 та ғалаба, 3 та дуранг, 7 та мағлубият қайд этган. Купер бошқарувида Ўзбекистон 2019 йилги Осиё Кубогида нимчорак финалгача етиб борган. У 2022 йилги Жаҳон чемпионати саралашида Фаластинга 0:2 ҳисобида ютқазилгач, истеъфога чиқарилган эди.