Ўзбекистон Чехиядан 10 та электропоезд сотиб олади

Чехиянинг Škoda Group компанияси Ўзбекистонга 10 та замонавий электропоезд етказиб бериш бўйича стратегик келишувни имзолади. Бу ҳақда кеча, 30 апрель куни компаниянинг расмий Linkedin саҳифасида хабар берилди. 

Қайд этилишича, лойиҳа қиймати 120 миллион еврони ташкил этади ва у маҳаллийлаштириш ва сервис хизматини ҳам ўз ичига олади. Келишув Чехия Бош вазири Андрей Бабишнинг Тошкентга ташрифи доирасида имзоланган.

“Биз илғор технологияларимизни тақдим этишга ва замонавий, самарали транспорт ечимларини таклиф қилишга тайёрмиз”, дейди компания бош директори Петр Новотний.

Компания томонидан Ўзбекистонга янги авлод поездлари, хусусан, Латвия ва Эстонияда синовдан ўтган платформалар асосида яратилган 10 та минтақавий электр поезд олиб келинади. 

Эслатиб ўтамиз, аввалроқ Чехия Бош вазири Андрей Бабиш Ўзбекистонга ташриф буюургани ҳақида хабар берилган эди. Тошкент шаҳрида бўлиб ўтган музокаралар якунида Ўзбекистон Республикаси Президенти Шавкат Мирзиёев ва Чехия Республикаси Бош вазири Андрей Бабиш Кенгайтирилган ҳамкорликни илгари суриш тўғрисида қўшма декларацияни имзолаганди.

Ойбек Рустамов