Ўзбекистон 24 йилдан сўнг юнон-рум кураши бўйича жаҳон чемпиони бўлди

Ўзбекистонлик спортчи Айтжан Халмаханов юнон-рум кураши бўйича Хорватияда ўтган Жаҳон чемпионатида олтин медални қўлга киритди. Бу ҳақда Ўзбекистон Миллий Олимпия қўмитаси хабар берди. 

Ушбу натижа сўнгги 24 йил ичида юнон-рум кураши бўйича дунё биринчилигида ўзбекистонлик атлетларнинг қўлга киритган дастлабки олтин медали саналади. Терма жамоа Зегреб шаҳридаги мазкур мусобақада 1 та олтин, 1 та кумуш ва 3 та бронза медалини жамғарган.

Олтин медал:

-63 кг: Айтжан Халмаханов (юнон-рум кураши).

Кумуш медал:

-60 кг: Алишер Ғаниев (юнон-рум кураши).

Бронза медал:

-57 кг: Ғуломжон Абдуллаев (эркин кураш);
-65 кг: Умиджон Жалолов (эркин кураш);
-72 кг: Абдулло Алиев (юнон-рум кураши).

Маълумот учун, юнон-рум кураши бўйича жаҳон чемпиони бўлган илк ўзбекистонлик атлет Дилшод Орипов саналади. Грецияда 2001 йилда ўтган жаҳон чемпионати финалида у -58 кг вазн тоифасида арманистонлик Карен Мнацаканянни енгиб, олтин медални қўлга киритган.