Уруш бошидан бери камида 707 нафар украиналик бола ўлган – Зеленский (видео)

Россиянинг Украинага қарши кенг кўламли босқини бошланганидан бери камида 707 нафар украиналик бола ҳалок бўлган. Бу ҳақда Украина Президенти Владимир Зеленский 4 июнь – Агрессия қурбонлари бўлган бегуноҳ болаларни халқаро хотирлаш куни муносабати билан X ижтимоий тармоғидаги қилган мурожаатида маълум қилди.

“4 июнь – уруш ва зўравонликдан жабр кўрган болалар хотирасига бағишланган халқаро кун. Кенг кўламли босқин бошланганидан бери Россия камида 707 нафар кичик украиналикнинг ҳаётига зомин бўлди. Ҳар бир ўлим – келажаги тортиб олинган боладир. Россия бу жиноятлари учун жавобгарликка тортилиши керак”, дейди Зеленский.

Украина раҳбари ҳар бир ҳалок бўлган боланинг тақдири ортида йўқотилган орзулар ва барбод бўлган келажак турганини таъкидлаб, халқаро ҳамжамиятни ушбу жиноятларга ҳуқуқий баҳо беришга чақирган.

Маълумот учун, Россия ва Украина ўртасидаги можаронинг илдизлари аслида 2014 йилнинг баҳорига бориб тақалади. Ўшанда Украинадаги сиёсий ўзгаришлар ортидан Россия Қрим ярим оролини ўз таркибига қўшиб олганди ва Донбасс ҳудудида узоқ йиллар давом этган маҳаллий тўқнашувлар олови ёқилди. Бироқ вазият 2022 йил 24 февраль куни бутунлай ўзгариб кетди, чунки айнан шу куни Россия расмийлари томонидан “махсус ҳарбий операция” эълон қилиниб, Украина тупроқларига ҳар томонлама кенг кўламли босқин бошланган.

Эслатиб ўтамиз, аввалроқ Украина Президенти Владимир Зеленский “дунёдаги барча низолар тугашини кутиб ўтирмаслик” учун Россия Президенти Владимир Путин билан тўғридан тўғри музокаралар ўтказишга тайёрлигини билдирган эди.