Ўн минглаб мигрантлар Испаниянинг Сеута шаҳрига бостириб кирди (видео)

Африка қирғоқларининг шимолида жойлашган ва Марокаш билан чегарадош бўлган Испаниянинг Сеута автоном шаҳрига 49 мингдан ортиқ ноқонуний мигрант бостириб кирди. Бу ҳақда “Reuters” хабар берди.

Қайд этилишича, кеча, 30 июль куни бошланган Марокашдан ноқонуний кирувчилар оқимининг кескин ортиши бир сутка ичида анклавда гуманитар инқирозни келтириб чиқарган. Мамлакат Бош вазири Педро Санчес Сеутага қўшин юборишга фармойиш берган. Параллель равишда дипломатик можаро авж олмоқда: Италия Испания билан Шенген келишуви амал қилишини вақтинча тўхтатишга чақирган. 

Сеута маъмурияти 30 июль тонгидан бошлаб хавф сингналини чалиб, охирги ҳафта ичида шаҳарга Марокашдан 1,5 мингдан ортиқ мигрант ёриб кирганини маълум қилган. 30 июль кечқурунга келиб Испания ОАВлари 2–3 минг кишилик ноқонуний мигрантлар тўлқини ҳақида ёзган, бугун, 31 июль эрталабга келиб эса мамлакат ИИВ чегарани ноқонуний кесиб ўтган 49 минг киши ҳақида ҳисобот берган. Ваҳоланки, Сеута аҳолиси расман 80 минг кишидан сал кўпроқни ташкил қилади. Испанияга етиб олишга уриниш пайтида камида 19 минг мигрант ҳалок бўлган.

“Мен ёшлигимдан Испанияга кўчиб ўтишни орзу қилардим, шунинг учун Сеутага келдим. Испанияда профессионал футболчи бўлишга умид қиламан! Мен буларнинг барчасини оилам учун қиляпман”, дейди қочқинлардан бири.

Маҳаллий хавфсизлик кучлари бундай ноқонуний мигрантлар тўлқинини тўхтатиб қола олмаган. Испания Бош вазири Санчес шаҳарга шахсан ўзи боришга ваъда берган. Мамлакат Ички ишлар вазири чегара назоратини кучайтириш тўғрисида фармойиш чиқарган.

Испания ОАВлари айни пайтда Сеутага кирган мигрантларнинг баъзилари Марокашга қайтиб кетаётганини хабар қилмоқда. “El Pais” шаҳарга кирганлар озиқ-овқат ва тунаш учун жойлар етишмаслигидан, шунингдек, маҳаллий аҳолининг муносабатидан шикоят қилганини ёзмоқда.

Миграция инқирози дипломатик можарони келтириб чиқарган. Италия Бош вазири Жоржа Мелони Сеутадан олинган кадрлар унда “шок пайдо қилаётганини” айтган, Мадриддаги сўл ҳукуматни миграция сиёсати учун танқид қилган ва Испания билан Шенген келишуви амал қилишини тўхтатиш билан таҳдид қилган. Уни Италия Ташқи ишлар вазири Антонио Таяни қўллаб-қувватлаган.

“Мен Испания билан Шенген ҳудудини ёпишни қўллаб-қувватлайма. Ноқонуний ва назоратсиз иммиграция – миллий хавфсизликка таҳдид. Сеутадан олинган кадрлар шуни кўрсатадики, Мадрид ҳукуматининг 500 мингдан ортиқ ноқонуний мигрантларга Испания, демакки, Европа фуқаролигини бериш тўғрисидаги қарори чуқур хато бўлган”, дейди Таяни.

Испания ҳукуматига нисбатан кескин танқид билан маҳаллий мухолифат ҳам чиққан. Испания консерватив Халқ партияси ҳокимиятни “чегара устидан самарали назоратни” қайтаришга ва “ноқонуний кириб келганларнинг барчасини” ҳайдаб чиқаришга чақирган. Ўта ўнг “Vox” партияси етакчиси Сантьяго Абаскаль эса инқирозда шахсан Педро Санчесни айблаган.

Мамлакат ҳукумати инқироз сабабларини “мафия ва жиноий ташкилотлар” Испания Олий судининг июль бошидаги қароридан фойдаланиб қолгани билан изоҳлаган. Суд қарорига кўра, Сеутага етиб олишга уриниш пайтида денгизда қўлга олинган мигрантлар соддалаштирилган тартибда ортга қайтарилиши мумкин эмас. ТИВ раҳбари Альбарес италиялик ҳамкасбига жавоб бераётиб, айнан суднинг ушбу қарорига ҳавола келтирган ва ҳукуматнинг ҳаракатлари инқирозга олиб келмаганини таъкидлаган.

Маълумот учун, Сеута ва Мелилья – Африканинг шимолий қирғоғида жойлашган ва Европадан Гибралтар бўғози орқали ажралиб турган Испаниянинг икки автоном шаҳридир. Бу икки шаҳарда Европа Иттифоқининг Африка билан ягона қуруқликдаги чегараси ўтади.

Сеута мигрантлар оқими сабабли бундай инқирозга биринчи марта дуч келаётгани йўқ. 2021 йилда, ҳокимият баҳолашига кўра, шаҳарга ноқонуний равишда 10 мингдан ортиқ киши кириб борган. Бироқ бу ҳозиргидан бир неча баравар кам.