“Ўлдингми?”. Хитойда ноодатий илова оммалашмоқда

Хитойда “Ўлдингми?” номли янги илова пайдо бўлди ва у аҳоли орасида тез суръатларда оммалашмоқда. Бу ҳақда BBC хабар берди.

Хитой тилида Sileme (“Ўлдингми?”) деб аталадиган бу илова жуда содда ишлайди. Фойдаланувчи ҳар икки кунда бир марта иловадаги катта тугмани босиб, тирик эканини тасдиқлаши керак. Агар у буни қилмаса, илова олдиндан кўрсатилган фавқулодда алоқа контактига хабар юбориб, фойдаланувчига нимадир бўлганини хабар қилади.

Илова ўтган йилнинг май ойида ишга туширилган бўлса-да, фақат сўнгги ҳафталарда кенг оммалаша бошлади. Уни асосан Хитой шаҳарларида ёлғиз яшовчи ёшлар фаол юклаб олмоқда. Натижада, у мамлакатдаги пуллик иловалар орасида энг кўп юклаб олинган дастурга айланди.

Тадқиқот ташкилотлари маълумотига кўра, 2030 йилга бориб Хитойда ёлғиз яшовчилар сони 200 миллионга етиши мумкин.

Илова айнан шундай одамлар учун мўлжалланган бўлиб, ўзини “хавфсизлик бўйича ҳамроҳ” деб таърифлайди. У ёлғиз яшовчи офис ходимлари, уйидан узоқда таҳсил олаётган талабалар ёки онгли равишда ёлғиз ҳаёт тарзини танлаганлар учун мўлжалланган.

Илованинг нархи 8 юань (тахминан 1,1 доллар). Дастурчилар келажакда иловага SMS-хабарнома функциясини ҳам қўшишни режалаштирмоқда.

Мутахассислар илованинг машҳурлигини унинг провокацион номи ва Хитойда ёлғиз яшовчилар сонининг кескин кўпайиб бораётгани билан изоҳламоқда. 

Эслатиб ўтамиз, аввалроқ Хитойда ҳомилани кўтариб юриши мумкин бўлган робот устида иш олиб борилаётгани ҳақида хабар берилганди. Лойиҳа мамлакатда туғилиш даражаси пасайиши ва ортиб бораётган бепуштлик муаммосини ҳал қилишга қаратилган. Лойиҳа асосчисининг сўзларига кўра, сунъий бачадон технологияси аллақачон якуний босқичга етган.