Ўлат хавфи: Иркутскда карантин бекор қилинди

Иркутск вилоятида Иркутск ўлатга қарши институти ходимасининг ўлимидан сўнг маҳаллий даражада жорий этилган карантин режими бекор қилинди. Бу ҳақда кеча, 8 октябрь куни ҳудуд раҳбари Игорь Кобзев ўз видеомурожаатида маълум қилди. 

У “шифохонадан ташқари пневмония”дан ўлим ҳолати муносабати билан “профилактик тадбирлар мажмуи”ни якунлаган “Роспотребнадзор” экспертларининг маълумотларига таянди. Билдирилишича, касалланган аёл эмланган ва ўзи ишлаган хавфли инфекцияларга қарши иммунитетга эга бўлган, институтда патоген микроорганизмлар билан ишлашда эса фавқулодда вазиятлар аниқланмаган. Шунингдек, Кобзевнинг сўзларига кўра, марҳума билан алоқада бўлганларнинг барчаси тиббий кўрикдан ўтказилган.

“Инфекцион патология билан боғлиқ саломатлик бузилишлари аниқланмади. Қарийб 5 мингта лаборатория тадқиқотлари натижалари ҳеч қандай хавфли патоген микроорганизмларни аниқламади. Карантин бекор қилинди. Одатий режимда ишламоқдамиз”, дейди губернатор. 

Эслатиб ўтамиз, ўтган ҳафтада Иркутскдаги ўлатга қарши институтда ишлаган 28 ёшли лаборант Дарья Шипилованинг ўлими ҳақида маълум бўлган эди. “Роспотребнадзор” буни пневмония билан, бир қатор манбалар эса ўлат билан боғлади. Марҳума билан алоқада бўлган 200 га яқин киши изоляция қилинган эди. Шелеховдаги шифохона ва “Люди Байкала” маълумотларига кўра, Иркутскдаги яна бешта тиббиёт муассасаси карантинга ёпилган эди.

Бундан ташқари, Шелеховдаги Иркутск алюминий заводида ниқоб режими жорий этилганди. “Люди Байкала”нинг соғлиқни сақлаш соҳасидаги манбаси шифокорлар “аллақачон ўлат ҳақида очиқчасига гапиришаётганини”, аммо расмий ҳужжатларда касаллик тилга олинмаганини таъкидлаган эди. Иркутскнинг карантинга ёпилган туғуруқхонасида ётган аёллардан бирининг сўзларига кўра, шифокорлар тўловли ҳамкорликдаги туғуруқ шартномасига қарамай, ўлатни важ қилиб, унинг эрини палатага киритишмаган.

Кобзев Бутунжаҳон соғлиқни сақлаш ташкилоти (ЖССТ) фуқаролар саломатлиги учун хавфлар йўқлигини “очиқчасига тасдиқлаганини” айтди. Унинг маълумотларига кўра, Иркутск ва Шелеховдаги санитария-эпидемиологик вазият “барқарор”.

Шу билан бирга, ЖССТ раҳбари Тедрос Аданом Гебреисус ташкилот ҳалигача Иркутск вилоятидаги вазият бўйича “тўлиқ тасаввур”га эга эмаслигини билдирди. Унинг сўзларига кўра, шу сабабли ЖССТ “хавфларни кенг кўламли баҳолай олмайди”. Гебреисус “сабаби аниқланмаган пневмонияга чалинган иккинчи ходим” ҳақидаги тасдиқланмаган хабарлар бўйича Россия Федерациясидан қўшимча изоҳлар кутаётганини таъкидлади.

Ўзбекистон Санитария-эпидемиологик осойишталик ва жамоат саломатлиги қўмитаси раисининг биринчи ўринбосари Нурмат Отабеков мамлакатда ўлат касаллиги билан боғлиқ эпидемиологик вазият барқарор эканини ва хавотирланишга ҳеч қандай асос йўқлигини маълум қилди.