Украинанинг “севимли” нишони: Wildberries яна ҳужумга учради (видео)

Бугун, 5 август куни Украина Россиянинг Тула вилоятидаги Wildberries компаниясининг логистика марказига ҳужум қилди. Бу ҳақда “Reuters” хабар берди.

Қайд этилишича, ҳужум оқибатида логистика марказида ёнғин юзага келган. Тула вилояти губернатори Дмитрий Миляевнинг Telegram’да маълум қилишича, ҳужум оқибатида бир киши жароҳатланган.

Сўнгги вақтларда дрон ҳужумларида ўндан ортиқ объекти зарар кўрган Wildberries компанияси ҳам ҳужумни тасдиқлаган. Компания ҳодиса юз берган логистика марказидан ходимларни эвакуация қилгани ва етказиб бериш жараёнларини бошқа йўналишларга ўтказганини маълум қилган.

Миляевнинг билдиришича, ҳужум оқибатида Новомосковск шаҳридаги ҳамда Узловая туманидаги иккита саноат объекти, шунингдек, Тула вилоятининг бошқа ҳудудидаги иккита кўп қаватли турар жой бинолари ҳам шикастланган.

Эслатиб ўтамиз, Россия қўшинлари бугун, 5 августга ўтар кечаси Украина пойтахти Киев ва Киев вилоятига баллистик ракеталар ҳамда дронлар билан ҳужум уюштирган эди. Ҳужум оқибатида камида 15 киши ҳалок бўлган, 50 га яқин одам яраланган.