Украинанинг НАТОга қўшилиши Россия учун нажот бўлади – Зеленский

Украина Президенти Владимир Зеленский мамлакатнинг НАТОга кириши Россия учун нажот бўлишини айтди. Бу ҳақда у Лотин Америкаси ОАВларига берган интервьюсида сўз очди.

Зеленскийга кўра, Украинанинг альянсга аъзо бўлиши Киев келажакда Россия ҳудудига кирмаслигининг ўзига хос кафолати бўлади.

“НАТО бўлган жойда уруш бўлмайди. Барча давлатлар Совет Иттифоқи ўз оёқлари, қўллари ва Путиннинг васвасаси билан қайтиб келишидан қўрқиб, НАТОга қўшилди. Украина учун НАТО ҳужумкор миссия эмас, биз ҳеч қачон ҳужум қилмаганмиз. Қаерга олдинга борсак, бу бизнинг ҳудудимиз. Биз уни қайта тиклаяпмиз. Агар Украина НАТОда бўлса, Россия миннатдор бўлиши керак. Айнан шундай! Чунки Украина келажакда уларнинг ҳудудига ҳеч қачон келмаслиги Россия учун хавфсизликдир”, деганди Зеленский.

Шунингдек, Президент, агар Украина аскарлари ўз ҳудудида жойлашган бўлса ва бу урушдан кейин, тинч даврда ўз чегараларини қўриқласа, НАТО давлатлари, худди Болтиқбўйи давлатлари каби жуда хурсанд бўлишларига ишонч билдирган.

“Чунки бизда кучли армия ва кўплаб аскарлар борлигини ҳамма яхши тушунади”, дея қўшимча қилган давлат раҳбари.

Маълумот учун, ўтган йилнинг 30 сентябрь куни Украина тезлаштирилган тартиб асосида НАТОга аъзо бўлиш учун ариза берган. Кейин Президент Зеленский Украина аллақачон альянс стандартларига жавоб беришини исботлаганини айтган. Бироқ альянс низомига кўра, уруш ҳолатида бўлган давлатлар НАТОга кириши мумкин эмас. Шунинг учун ҳам жорий йилнинг 11–12 июль кунлари Вильнюсда бўлиб ўтган НАТО саммитида Украинанинг альянсга кириш масаласи кўриб чиқилган.