Украинага Ғарбнинг эскирган самолётлари керак эмас – Киев

Украинага Франциянинг Mirage қирувчи самолётлари ва Россия ҳаво мудофааси томонидан йўқ қилинадиган бошқа эскирган Ғарб самолётлари керак эмас. Бу ҳақда Украина Қуролли кучлари Ҳарбий-ҳаво кучлари вакили Юрий Игнат “Украина” медиа марказида бўлиб ўтган брифингда маълум қилди.

"Ҳар қандай ёрдам биз учун муҳим, лекин Mirage 2000 кўринишида эмас. Биз бу ҳақда кўп марта гаплашганмиз", деган Игнат.

Унинг сўзларига кўра, Украина Американинг А-10 самолётига ҳам қизиқмайди.

"Хўш, А-10 ҳужумчи самолёти, агар Россия ҳаво мудофааси уни осонгина йўқ қилса, бу қандай ёрдам бериши мумкин? Ҳозир авиация флотидан ҳар қандай нарсани олишга бизнинг қурбимиз етмайди. Бу шунчаки мантиқсиз. Бу шунчаки халқимизнинг меҳнатига путур етказади", дейди у.

Игнатнинг айтишича, Украина ҳарбийларига кўп мақсадли, замонавий самолёт керак.

“Mirage 2000 эскирган модель. Франция ва Европада анча яхши самолётлар бор, шунинг учун биз бу самолётларни кўриб чиқмоқдамиз", дея таъкидлаган ҳаво кучлари вакили.

Маълумот учун, француз матбуотида Киев ва Париж Mirage 2000 қирувчиларини Франция Ҳарбий-ҳаво кучларидан Украина Қуролли кучларига ўтказиш имкониятини муҳокама қилаётгани, томонлар бундай келишувни тузишга аллақачон яқинлашиб қолгани ҳақида хабарлар тарқалган.