Украинада Путинга яқин олигархларнинг активлари олиб қўйилди

Украинада бир қанча россиялик олигархларнинг мол-мулки давлат тасарруфига ўтказилди. Бу ҳақда бугун, 11 июль куни Украина Давлат тергов бюроси эълон қилди.

Маълум қилинишича, Коррупцияга қарши кураш бўйича Олий суд бир қатор тижорат тузилмалари ва уларнинг эгаларига нисбатан жазо чораларини қўллаш бўйича қарорлар қабул қилган.

“Кремлга яқин бўлган бир қанча россиялик олигархларнинг миллиардлаб гривнага тенг активлари Украина давлат бюджетига тушди”, дейилади хабарда.

Ушбу тижорат тузилмалари орасида Россия раҳбари Путинга яқин россиялик олигархлар, хусусан, ака-ука Аркадий ва Игорь Ротенберглар, Олег Дерипаска, Евгений Гинерлар ҳам бор.

Шундай қилиб, қуйидаги активлар давлат тасарруфига ўтказилган:

•  "Глуховский кварцит карери" ва "Николаев алумина заводи" масъулияти чекланган жамиятлари (Дерипаска, тахминий қиймати 272 миллион);

•  Ocean Plaza савдо маркази тахминий қиймати 350 миллион доллардан ортиқ (Ротенберг);

•  "Биринчи инвестиция банки" (Гинер) акцияларининг 88,89 фоизи.

Суд томонидан ҳибсга олинган ва қуйидаги мулкларни ўзлаштириш масаласи ҳам кўриб чиқилмоқда:

“Ривнеоблэнерго” (93,2%), “Херсоноблэнерго”  (99,9%), “Черновциоблэнерго” (96,8%), “Житомироблэнерго” (95,5%), “Кировоградоблэнерго” (72,9%) акциядорлик жамиятлари, шунингдек, умумий қиймати 2 миллиард (Гинерники) бўлган 7 та меҳмонхона ва 2 та савдо ва кўнгилочар марказлар.

Шунингдек, Украина иқтисодиётининг бошқа муҳим стратегик тармоқларида русларнинг устав капитали ва мулкининг турли улушлари ҳам олиб қўйилган. Хусусан, бу “Авангард-Виларти” МЧЖнинг 100 фоиз улуши бўлиб, у Ocean Plaza Project (Кипр)га қўшимча равишда Ethoder Investments Limited ва Lybid Investment Union компаниясининг 66,65 фоизига эгалик қилади.

Олег Дерипасканинг Украинанинг турли вилоятларидаги ер участкалари ва кўчмас мулклари, юзлаб махсус ва юк машиналари ҳам давлатга қайтарилган.

Украина томонидан ўзлаштирилган бошқа активларнинг эгалари россиялик – Александр Пономаренко ва Александр Скоробогатьколардир. Уларнинг юзлаб ишлаб чиқариш бинолари, ускуна ва омборлари олиб қўйилган.