Украинада ким президент бўлишини Трамп белгиламаслиги керак – Лукашенко

Беларусь резиденти Александр Лукашенко АҚШ Президенти Дональд Трампнинг Украина Президенти Владимир Зеленскийни алмаштириш зарурлиги ҳақидаги баёноти юзасидан ўз фикрини билдирди. Бу ҳақда “БелТА” хабар берди.

Журналистлар билан суҳбатда Лукашенко Оқ уй раҳбарининг сўзларига изоҳ берган.

“Мендан сиёсатчи сифатида жавоб олмоқчимисиз ёки мазмунан? Агар мазмунан бўлса, бу менинг фикрим – бу Трампнинг муаммоси эмас. Украинада ким президент бўлишини Украина халқи ҳал қилади”, дейди Лукашенко.

Беларусь резиденти, шунингдек, Владимир Зеленский ҳам ўз ваъдаларини бажариши кераклигини таъкидлаган. Лукашенконинг сўзларига кўра, Зеленский ўз вақтида давлат раҳбари лавозимида бир муддат қолишга ваъда берган.

“Сайловга бориш керак. Бу борада Трамп ҳақ: ваъда бердингми, бажариш керак. Лекин фақат белгилаш керак эмас. Трамп Украина қандай йўл тутишини белгиламаслиги лозим”, деб қайд этган у.

Эслатиб ўтамиз, аввалроқ Оқ уй раҳбари Дональд Трамп Владимир Зеленскийни кескин танқид қилиб, Украина келишувлар тузишга қодир бўлган янги етакчи топиши кераклигини айтган эди.

Кейинроқ ОАВ Украинанинг янги президенти лавозимига тўртта номзод номини келтирди.

Зеленскийнинг ўзи эса, агар Россия 60 кунлик тўлиқ ўт очишни тўхтатишга рози бўлса, президентлик сайловларини ўтказишга тайёрлигини билдирди. Бунга жавобан Кремль Зеленскийнинг Украинада сайловлар ўтказиш учун икки ойлик сулҳ тузиш ҳақидаги таклифини рад этди.

Яқинда эса Владимир Зеленский истеъфога чиқиш нияти йўқлигини айтди ва ҳозирда сайловлар ўтказиш имконияти ҳақида фикр билдирди.
Америкалик тадбиркор Илон Маск ҳам ўтган кунларда Зеленский Украина Президенти лавозимини тарк этиши кераклигини таъкидлади.
Трамп “Newsmax” билан бўлган сўнгги интервьюсида яна бир бор Украина Президентини кескин танқид остига олди.