Украина яна Wildberries омборларини бомбалади. Қурбон бор (видео)

Украина дронлари Россиянинг энг йирик онлайн-ритейлери Wildberries'нинг яна икки омборига ҳужум уюштирди. Бу ҳақда бугун, 22 июль куни компания раҳбари ва ҳаммуассиси Татьяна Ким Telegram-каналида маълум қилди. 

Кимнинг ёзишича, ҳужумлар Краснодар ва Невинномисск шаҳарларидаги омборларга амалга оширилган. Ижтимоий тармоқларда тарқалган видеоларда Краснодар осмонига кўтарилган улкан тутун устунини кўриш мумкин. 

“Бу кеча Краснодар ва Невинномисскдаги логистика марказларимиз ҳужумга учради. Ҳозир тегишли хизматлар билан биргаликда оқибатларни бартараф этиш устида иш олиб бормоқдамиз”, дейди компания раҳбари.

Маҳаллий ҳокимият эса яна бир жанубий шаҳар – Армавирда дрон қолдиқлари корхоналардан бирига тушиши оқибатида бир ишчи ҳалок бўлганини билдирган.

Краснодар ўлкаси губернатори Вениамин Кондратьевнинг айтишича, омбор мажмуасига қилинган ҳужумда 10 киши жароҳатланган. Шунингдек, дрон қолдиқлари Краснодардаги икки кўп қаватли уйга зарар етказган, аммо бу ерда ҳеч ким жабрланмаган.

“Бизнинг устувор вазифамиз – инсонлар. Тезкор эвакуацияни амалга оширган жамоамизга, қаҳрамонларимизга миннатдорлик билдираман. Дастлабки маълумотларга кўра, афсуски, жабрланганлар бор. Уларга тезроқ соғайиб кетишларини тилайман, биз албатта барча зарур ёрдамни кўрсатамиз”, деб ёзган Ким.

Ҳокимият ёнғинни ўчириш учун омборга вертолёт жалб қилиниши, ёнғинга қарши кураш ишларида жами 105 нафар ходим иштирок этаётганини маълум қилган.

“Оддий одамларга, ходимларимизга, ўз ишини бажараётган барчага қилинган бу ҳужумлар уйғотган ҳис-туйғуларни сўз билан ифодалаш мумкин эмас”, деган Татьяна Ким Telegram'даги саҳифасида.

Украина сўнгги ҳужумлар юзасидан ҳозирча изоҳ бермаган.

Маълумот учун, Wildberries дастлаб Европа каталогларидаги кийим-кечакларни қайта сотувчи интернет-дўкон сифатида фаолият бошлаган. Кейинчалик у маҳсулот турларини кенгайтириб, учинчи томон сотувчиларини ҳам қамраб олган маркетплейсга айланган. Компания етказилган зарар кўламига изоҳ бермаган.

Россия Интернет савдо компаниялари уюшмаси маълумотларига кўра, 2025 йилда мамлакатда онлайн савдо ҳажми 28 фоизга ошиб, 11,5 триллион рублга (147 миллиард доллар) етган. Бош вазир ўринбосари Александр Новак рақамли платформалар орқали товар ва хизматлар савдоси мамлакат ялпи ички маҳсулотининг тахминан 8,5 фоизини ташкил қилишини билдирган.

Эслатиб ўтамиз, жорий йил 18 июль куни Украина дронларининг аввалги ҳужумида Wildberries'нинг саккиз нафар ходими ҳалок бўлган, ёнғинлар келиб чиққан ва компания фаолияти издан чиққан эди.