Украина ўзининг тактик баллистик ракетасини илк бор жангда қўллади

Украина маҳаллий ишлаб чиқилган FP-7 тактик баллистик ракетасини илк бор жанговор шароитда қўллади. Бу ҳақда Украина Президенти Владимир Зеленский маълум қилди.

“Украинанинг тактик баллистик ракетаси – FP-7. Биринчи жанговор қўлланиш. Натижа учун раҳмат”, деб ёзди Зеленский ўзининг Telegram-каналида.

Унинг қайд этишича, навбатдаги босқич ушбу ракеталарни оммавий ишлаб чиқаришни йўлга қўйишдан иборат.

Маълум бўлишича, FP-7 ракетаси “Fire Point” компанияси томонидан ишлаб чиқилган. Компания бош директори Ирина Терех 11 сентябрь куни ракета икки босқичли синовдан муваффақиятли ўтгани ва жанговор шароитда текширишга тайёрланаётганини айтган.

FP-7 қуруқликдаги қурилмадан учирилади ва 200 километргача бўлган масофадаги нишонларни уриши мумкин. Ракета 150 килограммгача жанговор каллак олиб юришга қодир, унинг максимал тезлиги эса сониясига 1,5 километрга етади.

“Fire Point” компанияси ҳамраиси ва бош конструктори Денис Штилерман аввалроқ FP-7ни АҚШнинг ATACMS ракетасига ўхшаш қурол сифатида таърифлаган. Унинг айтишича, Украинада ишлаб чиқарилган ракета ATACMS’дан тахминан 2,5 баробар арзон.

Компания, шунингдек, 850 километргача масофага уча оладиган FP-9 ракетасини ҳам синовдан ўтказмоқда. Ирина Терехнинг айтишича, унинг узоқ масофага учиши сабабли тўлиқ синовларни Украина ҳудудида ўтказишнинг имкони йўқ.

“Fire Point” Украина армиясининг йирик пудратчиларидан бири ҳисобланади. Компания узоқ масофага учувчи FP-1 зарбдор дронлари ҳамда FP-5 “Фламинго” қанотли ракеталарини ишлаб чиқаради.

“Fire Point” FP-7 ва FP-9 ракеталарини ишлаб чиқаётганини 2025 йил сентябрида расман маълум қилган. Жорий йилнинг февралида эса FP-7нинг илк синов учирилишини намойиш этган.

Эслатиб ўтамиз, аввалроқ Россия кучлари Украинанинг шаҳарларига дронлар орқали ҳужум қилгани ҳақида хабар берилган эди.