Украина Ўзбекистоннинг “Foton” заводига санкция киритди
Олам
−
08 Декабрь 2023
15131Украина Президенти Владимир Зеленский мамлакат Миллий хавфсизлик ва мудофаа кенгаши тавсиясига кўра янги санкцияларни тасдиқлади. "Қора рўйхат"га киритилганлар орасида Ўзбекистондаги “Foton” электроника заводи ва унинг директори Марифхўжа Саидумаров ҳам бор. Рўйхат Президент девони сайтида эълон қилинди.
“Foton” ва унинг директори билан бирга 180 нафар жисмоний ва 184 та юридик шахсга нисбатан санкция киритилган.
Уларга нисбатан активларни блоклаш, давлат мукофотларидан маҳрум қилиш, лицензияларни бекор қилиш, Украина ҳудудида транзит ва савдо операцияларини чеклаш, хусусийлаштиришни тақиқлаш ва бошқа чекловчи чоралар қўлланилади ва санкция 10 йил давом этади.
Маълумот учун, “Foton” заводи 1942 йилда ташкил этилган ва бугунги кунда 68 минг квадрат метрга яқин иккита ишлаб чиқариш қувватига эга. 296 нафар мутахассис меҳнат қилаётган корхонанинг 85,6% акциялари давлатга тегишли.
“Ўзэлтехсаноат” уюшмаси раисининг биринчи ўринбосари Мансур Ҳошимов россиялик инвесторларга “Foton”нинг 85,15 фоиз акциялар пакетини таклиф қилиб, Ўзбекистонда электроника ва электротехника соҳасида ривожланиш стратегиясини биргаликда ишлаб чиқиш, телеком-ускуналар, маиший ва саноат роботларини яратишни йўлга қўйиш бўйича янги ишлаб чиқаришларни ташкил этиш таклифини илгари сурганди.
Эслатиб ўтамиз, жорий йилнинг ноябрь ойида ҳам Зеленский ўзбекистонлик корхона ва шахсларга санкция киритгани ҳақида маълум қилган эдик.
LiveБарчаси