Украина номидан музокара олиб бормайман – Трамп 

АҚШ Президенти Дональд Трамп Россия Президенти Владимир Путин билан бўладиган учрашувда Украина номидан ҳеч қандай музокара олиб бормаслигини ва Киевнинг Россия билан ҳудудий алмашинувларга кириш-кирмаслик масаласини ўзи ҳал қилишига йўл қўйишини билдирди. Бу ҳақда у бугун, 15 август куни Аляска томон учаётган Air Force One бортида журналистларга баёнот берди.

Трампнинг айтишича, унинг асосий мақсади – икки томонни музокара бошлашига эришиш, ҳудудий алмашинувлар эса шу жараёнда муҳокама қилинади.

“Бу масалалар муҳокама қилинади, лекин мен Украинага бу қарорни ўзи қабул қилишга йўл беришим керак. Улар тўғри қарор қабул қилади, деб ўйлайман. Мен бу ерга Украина номидан музокара олиб бориш учун эмас, балки уларни бир стол атрофида ўтказиш учун келганман”, дейди АҚШ раҳбари.

“Reuters”нинг ёзишича, унинг баёнотлари АҚШ-Россия музокараларидан хавотирланаётган Киев учун маълум бир тасалли бўлиши мумкин. 

Трампнинг айтишича, Россиянинг Украинадаги ҳужуми, эҳтимол, урушни тугатиш бўйича ҳар қандай музокараларда Путиннинг "қўлини мустаҳкамлашга" ёрдам бериши мумкин.

“Путин эҳтимол “саҳнани” тайёрлаяпти. Менимча, улар қандайдир келишув қилишга уриняпти. Путиннинг фикрича, музокара унга янада кўпроқ муаммони ечишга ёрдам беради. Аслида эса бу унга зарар келтиради” деди у.

АҚШ Президентининг айтишича, Россия иқтисодиётининг аҳволи ва масаланинг ўта аҳамиятлилиги ҳисобга олинганда, унинг Путин билан учрашуви муайян натижалар бериши кутилмоқда.

“Путин ақлли одам, мен ҳам шундай… Биз бир-биримиз билан чиқишиб кетамиз, ҳар икки томонда ҳам ҳурмат мавжуд ва биласизми, менимча, бундан нимадир чиқади”,  деди Дональд Трамп.

Трампнинг сўзларига кўра, Путин Россиядан бизнес вакилларини ҳам олиб келаётгани яхши белги, аммо уруш тугамагунча ҳеч қандай келишув тузилмайди.

“Бу менга ёқади, чунки улар бизнес қилишни истайди, аммо уруш ҳал этилмагунича ҳеч қанақасига бизнес қилинмайди”, деди у.

Владимир Путин ва Дональд Трампнинг Анкориждаги учрашувидаги Америка делегацияси таркибида Давлат котиби Марко Рубио, Савдо вазири Говард Лютник ва Молия вазири Скотт Бессент, шунингдек, Президентнинг махсус вакили Стив Уиткофф ва Марказий разведка бошқармаси директори Жон Рэтклифф бор.

Россия делегацияси таркибига Ташқи ишлар вазири Сергей Лавров, Ушаковнинг ўзи, Мудофаа вазири Андрей Белоусов, Молия вазири Антон Силуанов, Россия Президентининг хорижий давлатлар билан сармоявий ва иқтисодий ҳамкорлик бўйича махсус вакили Кирилл Дмитриев киради. Музокаралардан сўнг Путин ва Трамп қўшма матбуот анжумани ўтказади.

Музокараларнинг асосий мавзуси Украинадаги келишув, жумладан, 6 август куни Кремлда АҚШ Президентининг махсус вакили Стив Уиткофф иштирокидаги муҳокамалар натижаларини ҳисобга олган ҳолда бўлади. Ушаковнинг сўзларига кўра, тинчлик ва хавфсизликни таъминлаш, икки томонлама ҳамкорлик, хусусан, савдо-иқтисодий соҳадаги кенг кўламли масалалар ҳам муҳокама қилинади.

Дилбар Шоакромова