Украина F-16 учун НАТО давлатларидан нафақадаги учувчиларни ёллаши мумкин

Украина F-16 қирувчи самолётларини бошқариш учун нафақадаги америкалик учувчиларни ёллаши мумкин. Бу ҳақда Киевда бўлган америкалик республикачи сенатор Линдси Грэм маълум қилди.

“Озодлик учун курашмоқчи бўлган истеъфодаги F-16 учувчилари Украина томонидан ёлланиши мумкин. Украиналиклар НАТО мамлакатлари орасидан Украина ўз учувчиларини тайёрламагунча уларга ёрдам бериш учун нафақага чиққан тайёр учувчиларни излайди. Шундай қилиб, Киев ўзига берилган қирувчи самолётлардан украиналик учувчилар тайёргарликдан ўтаётган вақтда фойдаланиши мумкин бўлади. Мен бу масалани кўтармоқчиман. Мен Президент Жо Байдендан лавозимини тарк этишдан олдин, бу таклиф берилганига ишонч ҳосил қилишини сўрайман”, дейди сенатор.

Маълумот учун, Қўшма Штатлар 2023 йил май ойида Американинг F-16 қирувчиларини Украинага топширишга рухсат берди. Биринчи партияни Киевга Нидерландия топширди, у Дания, Бельгия ва Норвегия билан биргаликда унга 80 га яқин самолётни ваъда қилди.

“Уларнинг кўпчилиги қисмларга демонтаж қилиниши кутилмоқда”, деб таъкидлади “Times”.

“Bloomberg” 31 июль куни Украинага биринчи F-16 самолётлари келгани ҳақида хабар берди. Бир неча кундан кейин мамлакат Президенти Владимир Зеленский уларнинг биринчи кадрларини намойиш этди.

Украиналик учувчиларга Ғарб мамлакатларида, жумладан, Буюк Британия ва АҚШда F-16 самолётларини бошқаришга ўргатилган. Бироқ ўқитилган учувчиларнинг етишмаслиги Киев амалда фойдаланиши мумкин бўлган самолётлар сонини чеклайди. Жорий йилда 20 га яқин украиналик учувчи қирувчи самолётларни бошқариши мумкин бўлиши кутилмоқда.

Шундай қилиб, Киев бор-йўғи ўнта F-16 самолётини бошқара олади, чунки битта самолёт экипажи икки кишидан иборат.

Россия Ғарб давлатларининг Киевга қурол етказиб беришини қоралайди ва улар жанг майдонидаги вазиятни ўзгартира олмайди, деб ҳисоблайди. Кремль Украина армиясининг F-16 самолётларини олишини кескинлашув кучайиши ва Ғарб давлатларининг можарода иштироки ортиши билан боғлади.