UEFA Жаҳон чемпионати учун саралаш форматини ўзгартирмоқчи

Бугун, 25 январь куни Швецариянинг Ньон шаҳрида UEFA ижроия қўмитаси йиғилиши бўлиб ўтади. Бу ҳақда AS нашри хабар берди.

Йиғилишда Жаҳон чемпионати учун янги саралаш тизими масаласи муҳокама қилинади. 2026 йилдан бошлаб ЖЧда 48 та жамоа иштирок этади. ЖЧ учун Европага 16 та квота ажратилган. Шу сабабли UEFA саралаш босқичига ўзгартириш киритмоқчи. Дастлабки босқичларда тўрт ёки бешта жамоадан иборат 12 та гуруҳ тузилиши мумкин. Биринчи ўринни эгаллаган жамоалар тўғридан-тўғри жаҳон чемпионатига йўлланма олади, қолган тўртта ўрин эгалари плей-офф баҳсида ўйин ўтказади. Бу ягона вариант эмас, лекин ташкилот ўйинлар сонини камайтиришга қаратилган ўзгаришлар қилади.

Шунингдек, UEFA Миллатлар лигаси форматига ўзгартириш киритиш масаласини ҳам кўриб чиқади. Аввалроқ А лигаси гуруҳларида биринчи ўринни эгаллаган жамоалар “Тўртлик” финалига йўл олганди. Энди турнирнинг плей-офф босқичи бўлиши мумкин, унда иккинчи ўринни эгаллаган жамоалар ҳам иштирок этади.

Қайд этилишича, UEFA Европа чемпионатини 32 та жамоага кенгайтиришдан бош тортган. Янги формат 2028 йилдан бошлаб жорий этилиши режалаштирилган эди, бироқ ушбу ислоҳот режалардан чиқариб ташланди.