UEFA, ОФК ва КОНКАКАФ FIFA фаолиятини текширмоқчи

Европа футбол иттифоқи (UEFA), Осиё футбол конфедерацияси (ОФК) ва Шимолий, Марказий Америка ва Кариб денгизи футбол конфедерацияси (КОНКАКАФ) FIFA президенти Жанни Инфантинонинг Жаҳон чемпионати ҳуқуқларининг бир қисмини сотиш таклифидан сўнг ташкилот фаолиятини мустақил текширишга чақирди. Бу ҳақда “Reuters” нашри хабар берди.

Уч конфедерация футбол жамоатчилигига очиқ мактуб йўллаб, FIFA’даги сўнгги воқеалар юзасидан хавотир билдирган.

“Ҳурматли футбол оиласи! Футбол дунёдаги энг буюк умумий эҳтиросдир. У бирор шахс ёки ташкилотга тегишли эмас. У футболчилар, мухлислар, клублар, аъзо ассоциациялар ва келажаги ишониб топширилган ҳар бир муассасага тегишли”,  дейилади мактубда.

Конфедерациялар сўнгги ўн йилликдаги тараққиёт FIFA, конфедерациялар, аъзо ассоциациялар ва футбол ривожига ҳисса қўшган минглаб инсонларнинг умумий меҳнати натижаси эканини таъкидлади.

“Гап пулда эмас. Конфедерациялар аллақачон FIFA’нинг улкан захираларидан масъулиятли фойдаланишга ва аъзо ассоциацияларни ривожлантиришга инвестицияларни янада кучайтиришга чақирган. Гап мусобақаларни кенгайтириш, Жаҳон чемпионати маблағларини тақсимлаш ёки бошқа жамоавий қарорларни қайта кўриб чиқиш ҳақида эмас. Бу қарорлар биргаликда қабул қилинган ва улар ўз кучида қолиши керак. Гап янада фундаментал нарса – футболнинг яхлитлиги ва уни бошқариш учун сайланганларнинг ҳалоллиги ҳақида”,  дейилади мурожаатда.

Конфедерациялар FIFA’нинг яқинда вице-президентлари ва 211 та аъзо ассоциацияга юборган хатида жараёнда хатоларга йўл қўйилгани тан олинганини қайд этди. FIFA бу ҳолатни коммуникациядаги узилиш ва футбол манфаатларини нотўғри баҳолаш билан изоҳлаган.

Бироқ UEFA, ОФК ва КОНКАКАФнинг фикрича, Жаҳон чемпионати ҳуқуқларининг бир қисмини сотиш таклифининг ўзи жиддий хатога йўл қўйилганини англатади. Улар буни оддий процедурадаги хато эмас, балки FIFA хизмат қилиши керак бўлган институтларга бўлган ишончнинг жиддий бузилиши, деб баҳолади.

Конфедерациялар бундай ҳолат юзасидан текширувни FIFA’нинг ўзи, унинг ходимлари ёки футбол манфаатдор томонлари эмас, балки тўлиқ мустақил учинчи томон ўтказиши кераклигини таъкидлади.

Шунингдек, мактубда Марокашда ўтказилган раҳбарият йиғилишида фақат битта сайланган вакил иштирок этгани, FIFA Кенгаши ёки аъзо ассоциациялар вакиллари эса йиғилишга таклиф қилинмагани танқид қилинди.

“Масъулият бўлиши керак бўлган жойда сукут ҳукмронлик қилмоқда, очиқлик бўлиши керак бўлган жойда эса масофа бор. Бу футбол ўз раҳбариятидан кутадиган фазилатлар эмас”,  дейилади мурожаатда.

Конфедерациялар футбол раҳбариятини футболга буйруқ бериш эмас, унга хизмат қилишга чақирди.

Мактубни UEFA президенти Александр Чеферин, КОНКАКАФ президенти Виктор Монтальяни, ОФК президенти Салмон бин Иброҳим Ал Халифа, шунингдек, UEFA бош котиби Теодор Теодоридис, КОНКАКАФ бош котиби Филипп Можо ва ОФК бош котиби Датук Сери Виндзор Жон имзолаган.