Туркиянинг яна бир самолёти бошқа давлат ҳудудида қулаб тушди

Туркия ёнғин хавфсизлиги хизматига тегишли самолёт Хорватияда қулаб тушди. Ҳодиса оқибатида бортдаги учувчи ҳалок бўлган. Бу ҳақда “Hürriyet Daily News” хабар берди. 

Туркия Қишлоқ ва ўрмон хўжалиги вазири Иброҳим Юмаклининг маълум қилишича, Туркия ёнғин хизмати тасарруфидаги икки ўт ўчириш самолёти техник хизматдан ўтиш учун Хорватияга йўл олган.

“Самолётлар 12 ноябрь куни эрталаб Чаноққалъадан Загреб аэропортига учган. Ноқулай об-ҳаво шароити сабабли улар Риека аэропортида вақтинчалик тўхташга мажбур бўлган. Кейинроқ, Туркия вақти билан 17:38 да иккала самолёт яна Загребга учиб кетган, бироқ об-ҳаво ёмонлашгани сабаб орқага қайтишга қарор қилинган. Самолётлардан бири Риекага муаммосиз қайтган, аммо 18:25 да иккинчи самолёт билан алоқа узилган”, дея хабар берган вазирлик.

Шундан сўнг, Хорватияда қидирув-қутқарув ишлари бошланган ва мамлакатнинг Сень шаҳри яқинида самолёт парчалари топилган. Шу пайтда учувчининг ҳалок бўлгани ҳам тасдиқланган.

“Бу фожиали ҳалокатда ҳаётдан кўз юмган учувчимизнинг оила аъзолари ва яқинларига ҳамдардлик билдираман”, дейди вазир Иброҳим Юмакли.

Эслатиб ўтамиз, жорий йилнинг 11 ноябрь куни Туркия ҳарбий самолёти Грузия ҳудудида ҳалокатга учраган эди. Кейинроқ Туркия ҳукумати Грузияда қулаган ҳарбий самолётда 20 нафар ҳарбий хизматчи ҳалок бўлганини тасдиқлади. Ҳалокат жойидан барча учувчиларнинг жасадлари топилди.