Туркияни ҳеч ким урушга тортолмайди – Фидан

Туркия Ташқи ишлар вазири Ҳоқон Фидан Туркия Яқин Шарқдаги урушга тортилишга мутлақо қарши эканини билдирди. Бу ҳақда у Анқара шаҳрида Бангладеш Ташқи ишлар вазири Ҳалилур Раҳмон билан ўтказилган матбуот анжуманида маълум қилди.

Фиданнинг таъкидлашича, Туркия давом этаётган адолатсиз урушда иштирок этишни истамайди ва мамлакатни можарога жалб қилишга бўлган ҳар қандай уринишларга қатъий қарши. Унинг сўзларига кўра, Туркия провокацияларга берилмасликка қатъий қарор қилган ва мамлакатнинг ҳарбий ҳамда тийиб туриш салоҳияти жуда юқори.

Фиданнинг айтишича, Туркия стратегик жиҳатдан кучни қачон ва қаерда ишлатишни яхши билади. Бироқ урушни имкони борича тезроқ дипломатик йўл билан ҳал қилиш зарур. Унинг фикрича, Эронга қилинган ҳужумлар дарҳол тўхтатилиши керак, шунингдек Эроннинг қўшни давлатларга ҳужумлари ҳам тўхташи лозим. Шу билан бирга, томонлар тез орада музокараларга қайтиши керак.

Туркия Ташқи ишлар вазири Яқин Шарқдаги можаро сабабларини энди инкор этиб бўлмаслигини ҳам таъкидлаган. Унинг сўзларига кўра, Туркия анчадан бери Исроил Бош вазири Биньямин Нетаньяху ҳукумати юритаётган экспансионист сиёсат ва унинг фундаменталистик мафкураси ҳақида огоҳлантириб келмоқда. Фиданнинг таъкидлашича, Исроил минтақада ташқи аралашувлар орқали ўз геосиёсий манфаатларини амалга оширмоқда.

Шунингдек, у Исроил ҳукумати Ғазодаги сулҳ келишувини бузишда давом этаётганини ва бу ердаги гуманитар вазият кун сайин ёмонлашаётганини айтган.

Фиданга кўра, Туркия Нетаньяху “Ҳизбуллоҳ”га қарши кураш баҳонаси билан Ливанда янги қирғин содир этиши мумкинлигидан хавотирда. Унинг сўзларига кўра, халқаро ҳамжамият Исроил томонидан содир этилаётган жиноятларга қарши зудлик билан чора кўриши керак.

Эслатиб ўтамиз, аввалроқ Эроннинг Анқарадаги элчиси Муҳаммад Ҳасан Ҳабибуллоҳзода Эрондан Туркия томонга учирилган ракеталар ҳақида изоҳ бериб, Туркиянинг миллий суверенитетига ҳурмат билан қаралишини билдирганди. Ҳабибуллоҳзода дўст ва қардош давлат бўлган Туркиянинг саъй-ҳаракатларига ишонишини айтиб, айниқса, Президент Эрдўған ва Ташқи ишлар вазири Ҳоқон Фиданнинг бу борадаги ҳаракатларига миннатдорлик билдирган.