Туркиялик таниқли тадбиркор Мирзиёев қабулида бўлди

Ўзбекистон Республикаси Президенти Шавкат Мирзиёев бугун, 8 август куни Туркиянинг “Cengiz Holding” компанияси бошқаруви раиси Мехмет Женгиз бошчилигидаги делегацияни қабул қилди.

Учрашувда ўзаро манфаатли ҳамкорликни янада кенгайтириш, шу жумладан Ўзбекистон иқтисодиёти тармоқларини ривожлантириш ва модернизация қилиш бўйича қўшма лойиҳаларни амалга ошириш масалалари кўриб чиқилди.

Приздент Администрациясининг билдиришича, Туркиянинг етакчи кўп тармоқли холдинги иштирокида Ўзбекистонда иккита лойиҳа муваффақиятли якунланган – Тошкент ва Сирдарё вилоятларида умумий қуввати 460 мегаваттли замонавий электр станциялар ишга туширилган.

Учрашув чоғида давлат раҳбарига ушбу энергетика объектларининг кўрсаткичлари тўғрисида батафсил ахборот берилган.  

Бундан ташқари, Президент Жиззах вилоятида қуввати 500 мегаваттдан зиёд бўлган яна бир электр станция қурилишига старт берди.

Шавкат Мирзиёевга “Cengiz Holding” компанияси томонидан умумий қиймати 5 миллиард доллардан зиёд бўлган янги лойиҳаларни амалга ошириш режалари тақдимот қилинган.

Автомобиль йўллари ва туннелларни модернизация қилиш ва қуриш, геология-қидирув ишларини бажариш ва истиқболли фойдали қазилма конларини ўзлаштириш, энергетика инфратузилмасини давлат-хусусий шериклик шартларида бошқариш шундай лойиҳалар жумласидан.

Ўзбекистон етакчиси туркиялик инвестор иштирокидаги истиқболли лойиҳаларни тез фурсатда тайёрлаш ва тўлиқ амалга ошириш юзасидан топшириқлар берди.