Туркияда ўрмон ёнғинлари авж олди. Одамлар эвакуация қилинди (видео)

Туркиянинг Анталия ва Адана вилоятларида ўрмон ёнғинлари содир бўлди. Бу ҳақда “Anadolu” хабар берди.

Анталиянинг Серик туманидаги Денизтепеси ва Сариабали маҳаллаларида ўрмон ва қишлоқ хўжалиги ерлари жойлашган ҳудудда ёнғин чиққан. Хавфсизлик чораси сифатида айрим уйлар аҳолидан бўшатилган.

Ёнғин таъсирида қолган уйлардан бирида бўлган Иброҳим, Ҳадича ва Кираз Каража тутундан зарарланган. Улар тез ёрдам машиналарида шифохонага олиб кетилган. Ёнғинни ўчириш ишлари давомида хусусий компанияга тегишли экскаватор жарликка ағдарилиб кетган. Ҳодисада жароҳатланган ҳайдовчи ҳам шифохонага етказилган.

Айни вақтда ёнғинга 12 та сув ташувчи махсус техника, 4 та ўт ўчириш машинаси ва 6 та сув цистернаси ёрдамида қарши курашилмоқда. Ёнғинни ҳаводан ва ердан бартараф этиш ишлари давом этмоқда.

Шунингдек, Адананинг Козан туманида икки ҳудудда ўрмон ёнғинлари қайд этилган. Доганалани маҳалласи қишлоқ ҳудудидаги ёнғин ҳозирча номаълум сабабга кўра бошланган.

Кейинчалик Дюзағач маҳалласининг Дагилчак ҳудудида ҳам ўрмондан тутун кўтарилгани аниқланган. Ҳар икки ёнғинга қарши махсус техника ва вертолётлар жалб қилинган. Анталия ва Аданадаги ёнғинларни назоратга олиш ва тўлиқ бартараф этиш ишлари давом этмоқда.

Эслатиб ўтамиз, аввалроқ Бельгияда мамлакат тарихидаги энг йирик ўрмон ёнғинларидан бири содир бўлгани ҳақида хабар берилган эди.