Туркияда кончилар очлик эълон қилди (видео)

Туркия пойтахти Анқара шаҳрида кончилар бир ҳафтадан бери очлик намойишини ўтказмоқда. Бу ҳақда “Türkiye today” хабар берди.

Қайд этилишича, намойишчилар бир неча ой давомида уларга ойлик маош тўланмагани ва меҳнат ҳуқуқлари бузилгани учун норозилик билдирмоқда. 

Норозилик жорий йилнинг 13 апрель куни ишчилар Эскишаҳардан йўлга чиққач бошланган. Улар 20 апрель куни пойтахтга етиб борган, шундан сўнг ҳукумат навбатдаги юришни тўхтатгач, вазият янада кескинлашган. Кеча, 27 апрель куни ушбу очлик намойиши иккинчи ҳафтага ўтган.

Очлик намойишининг 8-кунини бошлаган турк кончилари Энергетика вазирлигига юриш қилишга уринган пайтда полиция томонидан қуршаб олинган. Тўсиқларни бузиб ўтишга ҳаракат қилган кончиларга ҳамда уларга бирдамлик билдирган намойишчиларга қарши полиция аччиқ газ қўллаган.

“Бизнинг олинмаган пулларимиз бор, компенсацияларимиз бор, касаба уюшмаси ҳуқуқларимиз бор. Бизга 5–6 ойлик иш ҳақи қарз. Раҳбаримиз эса бизга фақат жуда кичик қисмини тўлаяпти”, дейди кончилардан бири.

Эслатиб ўтамиз, аввалроқ Греция пойтахти Афина шаҳрида такси ҳайдовчилари уч кунлик иш ташлашни бошлаганди. Улар электромобилларга босқичма-босқич ўтиш тартибини жорий этиш, автомобилларни ижарага олиш қоидаларини белгилаш, автобус йўлакларидан фойдаланишга рухсат бериш ва солиқ юкини камайтиришни сўраган.