Туркияда фоҳишаликка мажбурланган икки ўзбекистонлик аёл қутқарилди

Туркиянинг Балиқесир вилояти Айвалик туманида полиция томонидан ўтказилган тезкор тадбирда аёлларни фоҳишалик билан шуғулланишга мажбурлаб, воситачилик қилгани аниқланган 3 нафар гумонланувчи қўлга олиниб, фоҳишалик билан шуғуллангани аниқланган 3 нафар чет эл фуқароси бўлган аёллар қутқарилди. Улар орасида ўзбекистонлик аёллар ҳам бор. Бу ҳақда Туркия маҳаллий оммавий ахборот воситалари хабар бермоқда. 

Ўтказилган тезкор тадбир натижасида судга юборилган 3 нафар гумонланувчи қўлга олинган бўлса, озод этилган 3 нафар аёл депорт қилиш учун Депортация марказига топширилган 

Қайд этилишича, Айвалик туман Ички ишлар бошқармаси ходимлари фоҳишаликка воситачилик қилиб, аёлларни жинсий алоқага мажбурлаган гумонланувчиларга қарши иш бошлаган. Шу муносабат билан ўтказилган техник ва жисмоний кузатувдан сўнг, уч нафар гумонланувчи икки нафар Ўзбекистон фуқароси ва бир нафар Қирғизистон фуқаросини фоҳишалик билан шуғулланишга мажбурлаб, эркаклар билан жинсий алоқа қилишлари учун жой таъминлаб бергани аниқланган. Гумонланувчилар аёллар билан жинсий алоқада бўладиган шахсларни манзилларидан олиб, яна қайтариб олиб бориб, уларнинг транспортини таъминлагани ҳам аниқланган. 

Зарур далиллар ва маълумотлар тўплангандан сўнг, ҳуқуқ-тартибот органлари томонидан гумонланувчиларга нисбатан операция ўтказилган. Аёлларни фоҳишалик билан шуғулланишга мажбурлаб, воситачилик қилгани аниқланган гумонланувчилар ва фоҳишалик билан шуғуллангани аниқланган 3 нафар аёл ушланган.  

Гумонланувчилар ва фоҳишаликка мажбурланган аёлларнинг тинтув вақтида қўлга киритилган пул маблағлари ва жиноят содир этишда фойдаланилган деб баҳоланган уяли телефонлари мусодара қилинган. Фоҳишалик билан шуғулланган аёллар тартиб-қоидалардан сўнг депорт қилиш учун Депортация марказига топширилди. Аёлларни фоҳишаликка мажбурлагани аниқланган 3 нафар гумонланувчи ҳибсга олинган.