Туркия Алиевнинг Гранадага боришни рад этганини олқишлади

Туркия Президенти Ражаб Тойиб Эрдўған Арманистон бўйича 5 октябрь куни Испаниянинг Гранада шаҳрида ўтказилиши режалаштирилган йиғилишда қатнашмайди. Бу ҳақда Туркия ҳукмрон “Адолат ва тараққиёт” партияси расмий вакили Умар Челик маълум қилди. 

“Биз Озарбайжон Президенти Илҳом Алиевнинг тадбирдаги иштирокини бекор қилиш ҳақидаги қарорини юқори баҳолаймиз. Кўриб турганингиздек, у ерда Франция, Германия ва Европа Иттифоқи вакиллик қилади, Арманистон эса у ерда. Туркия у ерда бўлмайди, Президентимиз у ерда қатнашмайди. Ва унинг йўқлигида улар бу масалаларни муҳокама қилишади”, дейди Туркия телеканалларида нутқи намойиш этилган Челик. 

У Эрдўғаннинг Гранадада йўқлиги ва Алиевнинг рад жавобини Туркиянинг ушбу тадбирда иштирок этишини назарда тутувчи шартлар бажарилмагани билан изоҳлади. 

Челик Франциянинг Қорабоғ муаммосини муҳокама қилишдаги иштирокини ҳам танқид қилиб, Минск гуруҳи аъзоси бўлгани учун бу муаммони кўп йиллар давомида ҳал қилмагани ва арманларнинг геноцид ҳақидаги ғояларининг вакили эканлигини таъкидлади.  

“Франция эса у ерда ўтиради, лекин минтақада тинчлик миссиясини илгари сураётган Туркия ва Президентимиз вакиллик қилмайди. Бу Президент Алиев учун номақбул бўлиб чиқди, шунинг учун у ташрифни бекор қилди”, дейди Челик.  . 

Эслатиб ўтамиз, бугун, 4 октябрь куни Озарбайжон Президенти Илҳом Алиев 5 октябрь куни Испаниянинг Гранада шаҳрига ташриф буюришдан бош тортди. У ерда 5 октябрь куни Европа Иттифоқи, Франция ва Германия раҳбарлари иштирокида Арманистон Бош вазири Никол Пашинян билан учрашув ўтказилиши керак эди. Маълумотларга кўра, рад этишга Франциянинг бузғунчи позицияси, шунингдек, Париж ва Берлиннинг Туркиянинг учрашувдаги иштироки бўйича келишмовчилиги сабаб бўлмоқда. 

Аввалроқ, Франция Ташқи ишлар вазири Катрин Колонна арманистонлик ҳамкасби Арарат Мирзоян билан учрашув якунлари бўйича ўтказилган матбуот анжуманида Франция Арманистон билан ҳарбий ёрдам етказиб бериш бўйича шартнома имзолашга тайёрлигини айтиб ўтган эди. Бу эса Бакунинг норозилигига сабаб бўлди. 

Арманистон Бош вазири Никол Пашинян Озарбайжон Президенти Илҳом Алиев учрашув ўтказишдан бош тортганига қарамай, 5 октябрь куни Европа сиёсий ҳамжамияти саммитида иштирок этиш учун Испаниянинг Гранада шаҳрига ташрифини бекор қилмади.