Тўқаев куч тузилмаларида қатор тайинловларни амалга оширди 

Қозоғистон Президенти Қосим-Жомарт Тўқаев бугун, 25 февраль куни Асет Исекешевни Хавфсизлик кенгаши котиби лавозимидан озод қилди. Унинг ўрнига собиқ бош прокурор Гизат Нурдаулетов тайинланди. Бу ҳақда давлат раҳбари матбуот хизмати хабар берди.  

“Исекешев Асет Орентаевич Қозоғистон Республикаси Президентининг ёрдамчиси этиб тайинлансин, у Қозоғистон Республикаси Президентининг ёрдамчиси – Қозоғистон Республикаси Хавфсизлик кенгаши котиби лавозимидан озод этилсин”, дейилади фармонда. 

Шу куни Тўқаев Гизат Нурдаулетовни бош прокурор лавозимидан озод этиб, Президент ёрдамчиси – Хавфсизлик кенгаши котиби этиб тайинлади. 

Нурдаулетов 1964 йилда туғилган. У 2019 йил мартидан Қозоғистон бош прокурори лавозимида ишлаб келаётганди. 

Коррупцияга қарши курашиш хизмати 

Тўқаев Олжас Бектеновни Республика Коррупцияга қарши курашиш хизмати раиси этиб тайинлади. 

“Бектенов Олжас Абаевич Қозоғистон Республикаси Коррупцияга қарши курашиш агентлиги (Коррупцияга қарши курашиш хизмати) раиси этиб тайинлансин”, дейилади Президент фармонида. 

Шу куни давлат раҳбарининг фармойиши билан Бектенов Коррупцияга қарши курашиш агентлиги (Коррупцияга қарши курашиш хизмати) раисининг биринчи ўринбосари лавозимидан озод этилди. 

41 ёшли Бектенов 2019 йил июнь ойидан буён Коррупцияга қарши курашиш агентлиги раисининг биринчи ўринбосари лавозимида ишлаб келаётган эди. 

Ўтган йиллар давомида у Давлат хизмати ишлари ва коррупцияга қарши кураш агентлиги раҳбари ўринбосари, Қозоғистоннинг Оқмола вилояти ҳокими ўринбосари лавозимларида ишлаган. 

Ички ишлар вазирлиги 

Қозоғистон Президенти Ерлан Тургумбаевни Ички ишлар вазири лавозимидан озод қилди. 

“Давлат раҳбарининг фармони билан Тургумбаев Ерлан Заманбекович Қозоғистон Республикаси Ички ишлар вазири лавозимидан озод этилди”, дейилади хабарда. 

Тўқаевнинг буйруғи билан Тургумбаев Қозоғистон Республикаси Президентининг маслаҳатчиси этиб тайинланган. 

Коррупцияга қарши курашиш хизматининг собиқ раҳбари Марат Ахметжанов Қозоғистон Ички ишлар вазири этиб тайинланган. 

“Ахметжанов Марат Муратович Қозоғистон Республикаси Коррупцияга қарши курашиш агентлиги раиси лавозимидан озод этилиб, Қозоғистон Республикаси Ички ишлар вазири этиб тайинлансин”, дейилади Президент фармонида. 

57 ёшли Ахметжанов 2021 йилнинг апрелидан буён Коррупцияга қарши курашиш агентлиги раиси лавозимида ишлаб келаётганди. Ўтган йиллар давомида у Қозоғистон бош прокурори ўринбосари, Коррупцияга қарши кураш миллий бюросининг Атирау вилояти департаменти бошлиғи лавозимларида ишлаган.