Тўқаев Каспий денгизи хавф остида эканини айтди

Қозоғистон Президенти Қосим-Жомарт Тўқаев Каспий денгизида ҳар қандай ҳарбий қурол қўллашни истисно қилиш ва тақиқлашга чақирди. Бу ҳақда у бугун, 22 апрель куни Остонада ўтказилаётган Минтақавий экологик саммитдаги нутқида сўз очди.

Республика раҳбари Каспий денгизи хавф остида эканини ҳамда унинг ҳимояси экологик мувозанат, хилма-хиллик ва минтақавий барқарорлик учун зарурлигини таъкидлаган. Шу муносабат билан Қозоғистон денгизнинг кейинги деградациясининг олдини олиш бўйича давлатлараро дастур ишлаб чиқиш ташаббуси билан чиққан, шунингдек, минтақавий илмий ҳамкорликни ривожлантириш учун Каспий денгизи илмий-тадқиқот институтини ташкил этган.

“Биз барча халқаро ҳамкорларни ушбу ноёб табиий бойликни сақлаб қолиш борасидаги саъй-ҳаракатларимизни қўллаб-қувватлашга чақирамиз. Шу сабабли, Каспий минтақасида ҳар қандай ҳарбий қурол қўлланилиши истисно қилиниши ва тақиқланиши лозим”, дейди Қозоғистон Президенти.

Шу билан бирга, у глобал сув ҳамкорлиги масаласини ҳам кўтарган. Хусусан, Тўқаев 2025 йил декабрь ойида Ашхободда Бирлашган Миллатлар Ташкилотининг агентлиги сифатида Халқаро сув ташкилотини тузиш таклиф қилинганини эслатиб ўтган.

Республика раҳбарининг сўзларига кўра, ушбу ташаббус ҳозирги вақтда жуда долзарб, чунки БМТ минглаб мандатларни қайта кўриб чиқмоқда ва бу глобал сув ресурсларини бошқаришни кучайтириш учун имконият яратади. Ушбу таклиф бўйича маслаҳатлашувларнинг биринчи раунди Қозоғистон пойтахтида ўз ишини бошлаган саммит доирасида бўлиб ўтади.

Эслатиб ўтамиз, аввалроқ Шавкат Мирзиёев Остонада ўтаётган Минтақавий экологик саммитда “Марказий Осиёнинг тоза ҳавоси” давлатлараро консорциумини таъсис этишни таклиф қилган эди. Бундан ташқари, Ўзбекистон Президенти яна 7 та аниқ таклифни илгари сурди.