Тўқаев айрим олигархларга қарши “уруш” эълон қилди – ОАВ 

Қозоғистон Президенти Қосим-Жомарт Тўқаев 2 сентябрь куни парламентнинг икки палатаси йиғилишида эълон қилинган Қозоғистон халқига Мурожаатномасида ака-ука олигарх Нурлан ва Эрлан Ниғматулинларга қаттиқ сигнал берди. Бу ҳақда “KazTag” хабар берди. 

“Тўқаев ўзининг сўнгги мурожаатида ноқонуний активларни қайтариш бўйича реестрга киритилган, бироқ жамиятга ёрдам кўрсатишни кечиктираётган ишбилармонлар билан бошқача гаплашиши ҳақида огоҳлантирди. Бу манфаатдор томонларга юборилган ажойиб хабар. Шу билан бирга, ака-ука Нурлан ва Эрлан Ниғматулинларга қарши риторика ҳам кескинлашиб бормоқда”, дейилади хабарда. 

Нашр нафақат Ниғматулинлар, балки олигарх Динмуҳаммед Идрисовнинг ҳам кўп миллиард долларлик бойликларини назарда тутади.

Қайд этилишича, “Forbes” рейтингига бир неча бор киритилган Эрлан Ниғматулин бизнес билан муваффақиятли шуғулланган ва маъмурий ресурслар ҳомийлигида бўлган. У 9 та турли корхона ва компаниялар акцияларига эгалик қилади.

Нашрга кўра, собиқ президент Нурсултон Назарбоевга яқинлигидан фойдаланиб, хусусийлаштирилган давлат активлари орқали бойлик орттирган “эски Қозоғистон” олигархлари ҳозир икки гуруҳга бўлинган. Биринчи гуруҳ ноқонуний йўл билан олинган товарларни қайтаради, хайрия ишлари билан шуғулланади, мактаблар қуради. Иккинчиси эса буни қилишдан бош тортади.

“Ниғматулинлар иккинчи гуруҳга тегишли. Давлат раҳбари Қосим-Жомарт Тўқаев улар билан суҳбат “бошқача” бўлишини очиқ айтди. Жорий йилнинг сентябрь ойи охирида муайян ҳаракатлар бошланади”, дейилади хабарда.

Маълумот учун, Қозоғистон парламенти қуйи палатасининг собиқ спикери Нурлан Ниғматулин 2022 йил январь воқеаларидан кейин ўз лавозимини тарк этган. Кўп йиллар давомида у Қарағанда вилояти маъмурияти раҳбари бўлган. Нурлан Ниғматулиннинг эгизак укаси Эрлан Ниғматулин ўз вақтида парламентнинг ҳар икки палатаси аъзолигига муваффақ бўлган. Ака-ука Ниғматулинлар бир неча бор босқинчилик, жиноий тузилмалар ва схемаларга алоқадорлик, шунингдек, жиноят ишларини уюштиришда айбланган.