Трампнинг тарифлари Осиё фонд бозорларини қулатди

Осиё – Тинч океани минтақаси фонд бозорлари ўтган ҳафта АҚШ Президенти Дональд Трамп томонидан эълон қилинган тарифларга жавобан шиддат билан пасайишда давом этмоқда. Бу ҳақда BBC хабар берди.

Маълум қилинишича, Тинч океани минтақасининг 13 мамлакатидан йирик ва ўрта капиталлашувга эга компанияларни ўз ичига олган MSCI Asia Pacific индекси 2008 йилдан бери энг кучли пасайишни кўрсатган (-7,1 фоиз), Япониянинг Nikkei 225 эса “айиқ бозори” зонасига кирган - яъни аввалги максимал кўрсаткичдан 20 фоиз ёки ундан кўпроққа пасайган.

Қайд этилишича, бутун дунё бўйлаб сотиладиган товарларнинг аксарияти Осиёда ишлаб чиқарилгани сабабли, Осиё мамлакатлари ва ҳудудлари АҚШ томонидан жорий этилган тарифлардан тўғридан тўғри азият чекмоқда. Улар, шунингдек, глобал савдо уруши дунёнинг энг йирик иқтисодиётида пасайиш ёки ҳатто таназзулга олиб келиши мумкинлигидан хавотирда.

“Бу қонли қирғин”, дея BBCʼга изоҳ берган таҳлилчилардан бири.

Уолл-стритдаги инвестиция компаниялари Трамп маъмуриятининг тарифлар ҳақидаги эълонлари фонида ўз прогнозларини қайта кўриб чиққан. JPMorgan энди АҚШ ва дунёда рецессия (иқтисодий ўсиш суръатининг секинлашиши) эҳтимолини 60 фоиз деб баҳолаган.

Кеча, 6 апрель куни Air Force One самолётида журналистлар олдида чиқиш қилган Трамп бозорларнинг пасайиши уни хавотирга солмаётганини маълум қилган.

“Бирор нарса қулаб тушишини хоҳламайман. Аммо баъзида ниманидир тўғрилаш учун дори ичишга тўғри келади”, дея муносабат билдирган у.

Трампнинг сўзларига кўра, у дам олиш кунлари Европа ва Осиё етакчилари билан суҳбатлашган, улар Трампни шу ҳафтада кучга кириши керак бўлган тарифларни пасайтиришга кўндиришга умид қилмоқда.

“Улар музокаралар столига ўтиришмоқчи. Улар гаплашишни истайди, бироқ улар бизга ҳар йили кўп пул тўламаса, суҳбат бўлмайди”, деган Трамп.

АҚШ иқтисодиётининг жиддий секинлашуви Осиё экспортига зарба бериши мумкин, чунки Америка бозори минтақадаги товарлар учун асосий бозорлардан бири ҳисобланади

Эслатиб ўтамиз, аввалроқ Дональд Трамп бошқа мамлакатлар товарларига бож жорий этишини маълум қилди. Президентнинг таъкидлашича, “ўн йилликлар” давомида АҚШ бошқа давлатлар билан савдо тўсиқларини камайтирган, бу давлатлар эса “АҚШ маҳсулотларига улкан божлар ўрнатган”.

Баъзи давлатлар аллақачон Америка божларига жавоб чораларини эълон қилган. Масалан, Трамп 54 фоизлик бож жорий этган Хитой 10 апрелдан бошлаб АҚШдан импорт қилинадиган барча товарларга 34 фоизлик қўшимча божлар жорий этаётганини маълум қилди.